Атамалар рўйхати Автоматик назорат

Паз – деталлар сиртида ҳосил қилинадиган махсус шаклли ўйиқ ва ариқча. М: электр машиналарда бундай ариқчаларга чўлғамлар жойлаштирилади.
Пайвандлаш трансформатори – электр тармоғидаги кучланишни салт ишлаш режимида 60-70 В гача пасайтириб берадиган ва пайвандлаш учун зарур бўлган катта токка мўлжалланган бир фазали трансформатор.
Пакетли улагич – паст кучланишли бир нечта занжирни бир йўла қўлда улаб-узишга мўлжалланган қурилма. 600 В кучланишли 400 А гача ток кучига мўлжалланиб чиқарилади.
Пасайтирувчи трансформатор – иккиламчи чўлғамларидаги кучланишлар бирламчи чўлғамларидаги кучланишлардан кичик бўлган трансформатор.
Платина – қийин эрийдиган қаттиқ, чўзилувчан металл. Ундан электродлар ва юқори температурали электр печларининг спираллари тайёрланади.
Потенциал – мас; электр майдоннинг бирор А нуқтаси билан ер сиртидаги нуқта орасидаги кучланиш майдоннинг шу А нуқтасининг ерга нисбатан потенциали дейилади ва φ ҳарфи билан белгиланади. Бирлиги вольт (В).
Потенциаллар фарқи – стационар электр майдоннинг мусбат заряд бирлигини бир нуқтадан бошқа нуқтага кўчиришда бажарган иши. Агар φ₁ , φ₂ заряд кўчиш йўли траекториясининг бошланғич ва охирги нуқталари потенциали бўлса, у ҳолда потенциаллар фарқи U= φ₁ - φ₂ ,бўлади.
Прожектор – оптик системалар ёрдамида лампанинг ёруғлик оқимини маълум фазовий бурчак остида йиғиб, зарур томонга йўналтирилган ёритиш асбоби.
Пульт – бошқариш асбоблари, аппаратлари ўрнатилган жой. М; бошқариш пулти.
Реактив қаршилик – электр занжири тўла қаршилигининг мавҳум қисми бўлиб, у индуктив қаршилик X_L=ωL , сиғим қаршилик X_C=1/ωC ёки улардан ташкил топган йиғинди қаршиликдан иборатдир.
Реактив қувват – электр занжирининг индуктивлик ва сиғим элементларидан ўзгарувчан ток ўтганда ҳосил бўладиган қувват. Q ҳарфида белгиланиб, бирлиги вольт ампер реактив (Вар).
Реактив энергия – реактив қувват Q ва вақт t нинг кўпайтмаси билан аниқланадиган катталик бўлиб, W_p ҳарфи билан белгиланади.
Реактор – қисқа туташув токини чеклаш ва тармоқда қисқа туташиш содир бўлганда тақсимлаш қурилмаси шиналарида етарли кучланишни тутиб туриш учун қўлланиладиган юқори вольтли аппарат.