Asqarbekovna G’aznachilik fanidan mustaqil ta’limni tashkil etish bo’yicha uslubiy ko’rsatma

MUSTAQIL TA’LIMNINING SHAKL VA MAZMUNI
“G’aznachilik” fani bo’yicha talabaning mustaqil ishi shu fanni o’rganish jarayonining tarkibiy qismi bo’lib, uslubiy va axborot resurslari bilan to’la ta’minlangan.

Mustaqil ta’lim talabaning bajaradigan ilmiy izlanishi bo’lib, fanni o’rganishda bir mavzu to’liq o’zlashtiradi va topshiriq belgilangan shaklda bajariladi. Mustaqil ishni bajarishdan maqsad, talabaning o’qishi davomida olgan bilimini mustahkamlash, chuqurlashtirish va umumlashtirishdan iboratdir.

Mustaqil ta’limni tashkil etishning mazmuni: talabalar mustaqil ishlari mavzulari kelgusida bajariladigan kurs ishlari mavzulari hamda malakaviy amaliyoti bilan uzviylikda bajariladi.

O‘quv sessiyasigacha bo‘lgan muddatda sirtqi ta'limda o‘qish mustaqil, jumladan, masofadan turib ta'lim olish shaklida amalga oshiriladi.

Bunda talaba metodik ko‘rsatmalardan foydalangan holda ishchi o‘quv rejada semestr uchun rejalashtirilgan “G’aznachilik” fani bo’yicha dasturda keltirilgan mavzularni mustaqil o‘zlashtiradi.

Talaba fan bo‘yicha mustaqil ta’lim topshiriqlarni bajargandan so‘ng, uni fan o‘qituvchisiga belgilangan muddatlarda (odatda, masofadan turib Internet orqali) yuboradi hamda qayddan o‘tkazadi. Fan o‘qituvchisi talaba yuborgan materiallarni tekshirib, oraliq ishi sifatida baholaydi. Fan o‘qituvchisi mavzular bo‘yicha navbatdagi topshiriqlar va ko‘rsatmalarni yuborishi, shuningdek, on-layn rejimida o‘quv mashg‘ulotlarini o‘tkazishi mumkin.

Shuningdek, talaba o’quv sessiyasi davomida navbatdagi semestrda o’qitiladigan fanlar bo’yicha qisqacha ma’ruza va/yoki seminar mashg’ulotlari orqali tanishtiriladi. Ushbu mashg’ulotlar talabaga navbatdagi semester davomida fanlarni o’zlashtirishi va mustaqil topshiriqlarni bajarishi uchun asosiy va qo’shimcha adabiyotlar bilan ishlash usullari va texnologiyalarini o’rgatishga qaratiladi. Mavzular bo’yicha mustaqil topshiriqlarni bajarish yuzasidan metodik ko’rsatmalar beriladi.

“G’aznachilik” fanidan mustaqil ish majmuasi fanning barcha mavzularini qamrab olgan va quyidagi mavzular ko’rinishida shakllantirilgan.

“G’AZNACHILIK” FANIDAN O’TILADIGAN MAVZULAR VA TALABALARGA QO’YILADIGAN TALABLAR
Bakalavriat ta’lim yo’nalishida “G’aznachilik” fanidan o’tiladigan mavzular:

1. 
   “G’aznachilik” fanining predmeti, maqsadi va vazifalari
   
2. 
   Davlat budjeti g’azna ijrosining mohiyati va ahamiyati
   
3. 
   G’aznachilik faoliyatining tashkiliy-huquqiy asoslari
   
4. 
   G’aznachilik faoliyatining xorij tajribalari
   
5. 
   G’aznachilik yagona g’azna hisobraqamini yuritish
   
6. 
   G’aznachilikda budjet tashkilotlari xarajat smetalarini va ularga kiritiladigan o’zgarishlarni ro’yxatga olish
   
7. 
   G’aznachilikda yuridik majburiyatlar va ularni ro’yxatga olish
   
8. 
   G’aznachilikda narxlar monitoringi
   
9. 
   G’aznachilikda moliyaviy majburiyatlar
   
10. 
    G’aznachilikda to’lovlarni amalga oshirish
    
11. 
    Budjet tashkilotlari budjetdan tashqari mablag’larining g’azna ijrosini tashkil qilish
    
12. 
    Budjet daromadlarining g’azna ijrosini tashkil etish
    
13. 
    Davlat maqsadli jamg’armalari va boshqa nobudjet jamg’armalar g’azna ijrosi
    
14. 
    G’aznachilikda davlat kafolatlarini ta’minlash
    
15. 
    G’aznachilikda davlat xaridini tashkil etish
    
16. 
    G’aznachilikning yagona axborot tizimi
    
17. 
    O’zbekistonda g’aznachilik tizimi taraqqiyoti istiqbollari
    

Tavsiya etilayotgan mavzular bo’yicha ta’limning zamonaviy, xususan, interfaol metodlari, pedagogik va informatsion - kommunikatsion (mediata’lim, amaliy dastur paketlari, taqdimot, elektron-didaktik) texnologiyalari majmuali tarzda qo’llanilishi nazarda tutilgan. Jumladan, kompyuter dasturlari (jumladan, “TEO invest”) yordamida investitsiya loyihalari samaradorligini baholashni o’rganish uchun talab etiladigan manbalar nazariy-amaliy jihatdan shakllantiriladi va olingan ma’lumotlar o’rganiladi.

“G’aznachilik” fani yo’nalishning asosiy fani hisoblanadi. Dasturni amalga oshirish o’quv rejasida rejalashtirilgan matematik va tabiiy (oliy matematika, matematik programmalashtirish, iqtisodiy geografiya), umumkasbiy (iqtisodiy nazariya, statistika, pul, kredit va banklar, moliyaviy menejment, soliq va soliqqa tortish, sug’urta nazariyasi va h.,k.) fanlaridan yetarli bilim va ko’nikmalarga ega bo’lishlik talab etiladi.

“G’aznachilik” fanining ilmiy va amaliy ahamiyatini oshib borishi, o’z navbatida sirtqi ta’lim yo’nalishlarida tahsil olayotgan talabalarni “G’aznachilik” fani bo’yicha chuqur bilim va malakaga ega bo’lishlarida amaliy mashg’ulot darslari sifatini oshirish zaruriyatini yuzaga keltiradi.

Shuni ham aytish lozimki, mustaqil ta’lim mashg’ulotni tashkil etishning shakl va usullari nihoyatda ko’p. Loyiha ishi, nazorat savollariga javob berish va topshiriqlarini bajarish, test-sinov savollarini, keyslar, mashqlar, misol va masalalarni yechish, mustaqil ta’lim mavzusi bo’yicha taqdimotlar tayyorlash yuborish kabi usullardan foydalangan holda vazifalarni bajarib fan o’qituvchisiga masofadan turib, internet orqali yuboriladi. Bulardan qaysi birini tanlash va foydalanish muayyan fanga, o’qituvchining maqsad va vazifalariga, qolaversa uning tajriba va mahoratiga bog’liqdir.