Asosiy qism. Farg’ona mintaqasi ma’muriy tuzilishi va geografik o’rni

Andijon viloyati mehnat resurslarining iqtisodiy va ijtimoiy sohalarda bandligi va hududiy tarkibi
Makroiqtisodiy rivojlanishning asosiy vositalaridan biri bo`lgan aholining ish bilan bandlik darajasi murakkab muammolardan biri hisoblanadi. Bozor iqtisodiyotiga o`tish davrida ushbu masalani nazariy va amaliy jihatdan tadqiq etish muhim ahamiyatga egadir.
Ma’lumki, mehnat resurslarining ish bilan bandligi ijtimoiy geografiyaning muhim tushunchalaridan biridir.
Bandlik haqida so`z yuritilganda, eng avvalo, «bandlik» kategoriyasining mohiyati va ahamiyati to`g`risida ba’zi fikrlarni aytib o`tish joizdir. «Ish bilan bandlik» ijtimoiy-iqtisodiy kategoriya sifatida uzoq vaqtdan buyon iqtisodchi, iqtisodchi geograf, demograflarni doimo qiziqtirib kelgan. Ilmiy adabiyotlarda «ish bilan bandlik» tushunchasining umumiy qabul qilingan ta’rifi uchramaydi. Shu o`rinda professor V.G.Kostakov fikrini keltirib o`tish joizdir, ya’ni «har qanday ta’rif ham mukammal bo`la olmaydi. Lekin berilgan ta’rif u yoki bu jarayonning o`ziga xos bo`lgan eng xarakterli belgilarini ochib berishi kerak»<sup>1</sup>Ish bilan bandlik jamiyat ijtimoiy-iqtisodiy rivojlanishining muhim sektoridir. U iqtisodiy tizim faoliyatining iqtisodiy va ijtimoiy natijalarini o`zida mujassamlaydi. Aholining bandlik darajasi jamiyat mehnat faoliyatining umumlashgan ko`rsatkichi hisoblanadi. Bu ko`rsatkich turli mamlakatlarda va mintaqalarda turlicha bo`lib, u yoki bu mamlakatning ijtimoiy-iqtisodiy rivojlanish darajasini ham belgilab beradi. Aholining bandlik darajasi mehnat resurslaridan foydalanishning miqdor va sifat darajasi, mamlakatdagi mavjud iqtisodiy vaziyatni, aholining turmush darajasi va boshqalarni tavsiflaydi. Demak, aholi bandligi aholi turmush farovonligini oshirishning asosiy omillaridan biri bo`lib, olinadigan ish haqi va daromad miqdorini, binobarin aholini o`z-o`zini ijtimoiy himoyalash darajasini ham belgilaydi.
Mehnat resurslari iqtisodiyotda ishlash uchun jismoniy baquvvat, aqlan barkamol va kerakli bilimlarga ega bo`lgan mehnatga layoqatli yoshdagi aholidir.