Асосий конституциявий янгиликларнинг мазмуни ва моҳияти

5.6. Президент ва Олий Мажлис олдидаги масъулиятини кучайтириш ҳисобига Вазирлар Маҳкамаси сезиларли даражада мустаҳкамланмоқда, Ҳукуматнинг мақоми ўзгармоқда, уни шакллантиришда парламент қуйи палатасининг иштироки кенгайтирилмоқда.
Ҳусусан:

• 
  Вазирлар Маҳкамаси ўз фаолиятини Президент томонидан белгиланадиган ижро этувчи ҳокимияти фаолиятининг асосий йўналишлари доирасида амалга ошириши белгиланмоқда (114-модда);
  
• 
  Бош вазири номзоди парламентга сайловда энг кўп депутатлик ўринларини олган сиёсий партия томонидан Президент кўриб чиқиш учун таклиф этилиши тўғрисидаги конституцивий норма бекор қилинмоқда.
  

Бунинг ўрнига, илғор хорижий амалиётни инобатга олган ҳолда, Бош вазир ва Ҳукумат аъзоларини Қонунчилик палатаси маъқуллаганидан кейин Президент томонидан тайинлаш тартиби ўрнатилмоқда. Шу билан бирга, Бош вазир номзоди Президент томонидан қуйи палатадаги барча сиёсий партияларнинг фракциялари билан маслаҳатлашувлар ўтказилганидан сўнг таклиф этилади (109 ва 118-моддалар).
Мазкур ўзгариш парламент қуйи палатасининг Ҳукуматни шакллантиришдаги иштирокини кенгайтиришга қаратилган. Амалдагисидан фарқли равишда, жорий этилаётган Бош вазирни тайинлаш тартиби Қонунчилик палатасидаги сиёсий партиялар фракцияларини ифода этувчи барча сиёсий кучларни фикрини ҳисобга олиш имкониятини беради. Мазкур жараёнда мамлакат фуқаролари томонидан сайланган барча халқ вакиллари иштирок этишини инобатга олсак, ушбу тартиб янада демократиклигини кўриш мумкин.

• 
  Бош вазир лавозимига номзод уч марта рад этилган тақдирда Президент Бош вазирни тайинлаши ва Қонунчилик палатасини тарқатиб юборишга ҳақли эканлиги белгиланмоқда (118-модда);
  
• 
  Ҳукуматнинг ваколатлари ва функциялари, унинг масъуллиги сезиларли даражада кенгайтирилди. Хусусан, барқарор иқтисодий ўсишни таъминлаш, макроиқтисодий барқарорлик, қулай инвестиция муҳитини яратиш, қашшоқликни камайтириш, аҳоли учун муносиб турмуш шароитларини яратиш, атроф-муҳитни муҳофаза қилиш, табиий бойликларни сақлаш ва бошқа соҳаларда ўз олдига қўйилган вазифаларни ҳал этиш учун масъуллиги кенгайтирилди.
  

Бундан ташқари, Ҳукумат зиммасига ижро этувчи ҳокимияти органлари фаолиятида очиқлик ва шаффофликни, қонунийлик ва самарадорликни таъминлаш, давлат хизматларининг сифати ва очиқлигини ошириш, аҳолини, шу жумладан ногиронлиги бор шахсларни ижтимоий муҳофаза қилиш тизимининг самарали ишлашини таъминлаш, фуқаролик жамияти институтларини қўллаб-қувватлаш вазифалари юклатилди (115-модда).