Антидеприссантлар

Бемегрид – МНСга стимулловчи таъсир этади, нафас ва қон айланишининг турли хил бузилишларида, сусайишида яхши натижа беради. Бемегрид ухлатувчи воситаларнинг антагонисти ҳисобланади, шунинг учун ухлатувчи воситалар (барбитуратлар) билан заҳарланганда самарадор. Бемегридни қўллаётганда (томирга киритилаётганда) мушакларнинг озгина бўлса ҳам тортишиши препаратни тўхтатиш кераклигига белги бўлади. Бемегридни бошқа препаратлар билан қўшиб ишлатиш мумкин (метазон, кофеин). Бемегриднинг дозаси ошиб кетса кўнгил айниши, қусиш, тортишиш пайдо бўлади.
Кордиамин. Никотинат кислотаси диэтиламидининг 25%ли эритмаси. Синтетик препарат. Узунчоқ миядаги марказларни бевосита ва рефлектор қўзғатади. Заҳарлилиги паст. Кордиаминнинг таъсири томирга киритилганда ёрқин намоён бўлади: нафас олиш тезлашади ва чуқурлашади. Томир ҳаракатлантирувчи марказни қўзғатилганда қон айланиш тезлиги ортади, қон босими кўтарилади. Катта дозаларда кордиамин бош ва орқа мияни қўзғатади. Наркоздан уйғотишда кордиаминнинг самарадорлиги бемегрид ва коразолдан пастроқ. Кордиаминнинг ката дозалари тортишиш чақиради, чунки бош миядаги ҳаракат зоналарини қўзғатади.
Қўлланилиши: қон айланишининг ўткир ва сурункали бузилишида; юқумли касалликларда нафас ва қон айланиш бузилишида; коллапс, асфиксия, карахтликда, жарроҳлик муолажалари ўтказилганда.
Камфора. Борнеол спиртининг оксидланиш маҳсулоти. Камфора дарахтидан (Япония, Хитой) ёки камфора базилика ўтидан (Россия) олинади. Синтетик камфорани (чапга буралувчи изомер) скипидар (фақат сиртга ишлатилади) ва пихта мойидан олинади. Камфора маҳаллий таъсирлантирувчи хусусиятга эга (суртма, камфорали спирт). Камфора МНСга ва айниқса узунчоқ мияга ва юракга қўзғатувчи таъсир этади. Натижада нафасни қўзғатади ва томир уришини яхшилайди. Умуман камфора МНСдан юракка келувчи симпатик иннервация таъсиротини оширади. Бундан ташқари, у юрак мушакларига бевосита таъсир этади ва унинг симпатик нерв таъсиротига сезувчанлиги оширади. Периферик томирларни торайтиради, микроциркуляцияни яхшилайди, тромбоцитлар агрегациясини камайтиради. Нафас йўллари орқали ажралгани учун балғам ажралишини оширади. Камфоранинг терапевтик таъсири кенглиги катта.
Қўлланилиши: маҳаллий яллиғланиш, ревматизм, нафас ва қон айланиши бузилиши, юрак фаолиятининг сусайиши.