Антидеприссантлар

Кофеин-бензоат натрий – кофеинга нисбатан сувда яхши эрийди (1:2), организмда кофеинга нисбатан тезроқ ажралади. Таъсири кофеинники билан бир хил.
НООТРОП ВОСИТАЛАР
Бу гуруҳга кирувчи моддалар (noos - қалб, фикр, tropos – йўналиш) бош миянинг органик жароҳатланишлари туфайли юзага келган руҳий ва ақлий қобилиятнинг бузилишларини яхшилайди, чунки улар мияда энергия алмашинувига ижобий таъсир этади. ГАМК таъсирига ўхшаб метаболизмни ўзгартирадилар. Кўпгина ноотроп воситалар гипоксияга ва тутқаноққа қарши фаолликка эга. Ноотроп воситаларнинг таъсири секин-аста ривожланади ва уларни давомли қўлланилгандагина юзага келади (яширин даври катта).
Ноотроп воситалар гуруҳига аминолон, пирацетам, пантогам, пиридитол вап б. киради.
Аминалон (гаммалон) – МНСда моддалар алмашинувида иштирок этадиган ГАМКнинг препаратидир. ГАМК бош мияда тормозловчи медиатор бўлиб, мия тўқимасининг нафас олишида, глюкозанинг ишлатилишида, заҳарли моддаларнинг элиминациясида ва бош мияда модда алмашинувида иштирок этади. ГАМКнинг фармакологик таъсири унинг бош миядаги дофамин ва бошқа рецепторлар билан боғлиқ ГАМКергик рецепторларга таъсир этиши билан боғлиқ.
Аминалон бош миянинг сурункали касалликларида ақлий етишмовчиликни камайтиради, бунда унинг метаболик фаоллиги муҳим роль ўйнайди. ГЭТдан ёмон ўтади, лекин миянинг органик касалликларида унинг ўтиши кучаяди. ГАМК таъсирида фикрлаш, хотира, ўқиш яхшиланади. Мияда қон айланишининг бузилиши туфайли юзага келадиган ҳаракат, гапириш ва вестибуляр ўзгаришларни бартараф этади. Эпилептик ўчоқда ГАМК миқдорини меъёрига келтириши туфайли у тутқаноқ хуружларини камайтиради. Қонда қанд миқдорини ошган бўлса камайтиради, камайган бўлса оширади (гликогенолизни кучайтиради). Қон босимини камроқ даражада камайтиради, бу хоссаси гипертензияда кучли намоён бўлади.
Қўлланилиши: бош мияда қон айланишининг бузилиши туфайли юзага келган ақлий етишмовчилик (атеросклерозда, инсультлардан кейинги ҳолатларда, миянинг жароҳатларида). Алкоголь туфайли юзага келган ақлий заифликда (телбалик), туғма ақлий заифликда, тутқаноқда, баъзан гипертонияда. Таъсири секин ривожланади, даволаш бир неча ой давом этади. Ичишга ва вена орқали юборишга тавсия қилинади. Ножўя таъсирлари: диспепсия, уйқунинг бузилиши, АҚБнинг ўзгариб туриши.