Analitik kimyo

Laboratoriya ishlarini bajarish bo’yicha uslubiy ko‘rsatmalar

Laboratoriya mashg‘ulotida amaliy ishlarni bajarishga kirishishdan oldin talaba quyidagilarni bilib olishi kerak:

1. Asbobda ishlash va elektrodlardan foydalanish qoidalarini;

2. Ishni bajarish tartibi va xavfsizlik texnikasi qoidalarini;

3. Zarur bo‘lgan reaktivlar va kimyoviy jarayonlarning tenglamalarini;

4. Analiz natijalarini hisoblash va taqdim etish tartibi va shu kabilarni.

Har bir amaliy ishni bajarishda quyidagilarga qat’iy rioya qilish kerak:

1. Analiz uchun olinadigan modda yoki uning eritmasini ko‘rsatilgan miqdorda olishga;

2. Ishni bajarish tartibida keltirilgan har bir ko‘rsatmani to‘g‘ri va aniq bajarishga;

3. Analizni bajarish davomida har bir olingan qiymatni (asbobning ko‘rsatishi, alikvot qismning hajmi, qo‘shilgan titrant hajmi va boshqalar) darhol laboratoriya jurnaliga yozishga;

4. Bajarilayotgan har bir amalning mohiyatini har tomonlama o‘ylab, undan tegishli xulosalar chiqarishga;

5. Olingan har bir natijani o‘zaro taqqoslash va keskin chetlashgan qiymatlarni tashlab yuborishga;

6. Har bir parallel tajriba orasida titrlash stakani, elektrodlar va boshqalarni distillangan suv bilan tozalab yuvishga;

Ishni tugatgandan keyin asboblardagi eritmalarni maxsus idishlarga solish, elektrodlar va boshqa jihozlarni tozalab yuvish kerak. Elektrodlarni albatta distillangan suvda qoldirish, ish joyini tozalab, laborantga topshirish kerak.