Аmaliy topshiriq 1

Аmaliy topshiriq 1.
Oʼzbekiston Respublikasida professional taʼlim — iqtisodiyotning rivojlanish istiqbollari va ustuvor vazifalarini, zamonaviy texnika va texnologik tendentsiyalarni hisobga olib, mehnat bozoridagi kadrlarga boʼlgan real ehtiyoj, ish beruvchilarning takliflari hamda «Hayot davomida taʼlim olish» printsipi asosida shaxslarning taʼlim olishiga moʼljallangan.
1. Professional taʼlimni amalga oshirishda Oʼzbekiston Respublikasi Konstitutsiyasi va qonunlariga, Oʼzbekiston Respublikasi Oliy Majlisi palatalarining qarorlariga, Oʼzbekiston Respublikasi Prezidentining farmonlari, qarorlari va farmoyishlariga, Oʼzbekiston Respublikasi Vazirlar Mahkamasining qarorlari va farmoyishlariga, boshqa qonun hujjatlariga, shuningdek, ushbu Nizomga amal qilinadi.
2. Ushbu Nizomda quyidagi asosiy tushunchalar qoʼllaniladi:
boshlangʼich professional taʼlim — YuNESKO tashkiloti tomonidan qabul qilingan Taʼlimning xalqaro standart tasniflagichi (keyingi oʼrinlarda Xalqaro tasniflagich deb ataladi) 3-darajasiga mos keluvchi taʼlim dasturlari;
kasb — maxsus tayyorgarlik va ish tajribasi natijasida maʼlum bir sohada mehnat faoliyatni amalga oshirish uchun lozim boʼlgan nazariy bilimlar, amaliy koʼnikma va malakalar majmuasini egallagan, jismoniy imkoniyat, aqliy qobiliyat va huquqlari taʼminlangan mehnat faoliyati (mashgʼuloti)ning turidir;
kasbiy kompetentsiya — bilim, koʼnikma va amaliy tajriba asosida kasbiy faoliyatga tegishli vazifalarni bajarishda faoliyat yuritish qobiliyati;
kasb-hunar maktabi — Xalqaro tasniflagichning 3-darajasiga mos keluvchi taʼlim dasturlari asosida 9-sinf bitiruvchilarini ijtimoiy qoʼllab-quvvatlashga qaratilgan boshlangʼich professional taʼlim bosqichida kadrlar tayyorlaydigan taʼlim muassasalari;
kvalifikatsiya — kasbiy mahorat darajasi yoki pogʼonasi kasbiy talablarning muayyan pogʼonasiga muvofiqligi darajasi;
kollej — Xalqaro tasniflagichning 4-darajasigacha mos keluvchi taʼlim dasturlari asosida kadrlar tayyorlaydigan vazirliklar va idoralar tizimida faoliyat koʼrsatadigan taʼlim muassasalari;
kompetentsiya — bilim, koʼnikma, malaka va shaxsiy sifatlar majmui;
koʼnikma — muayyan vazifani bajarish uchun egallangan qobiliyat;
mutaxassislik — biror kasb doirasida maʼlum bir faoliyat turi uchun maxsus tayyorgarlik va amaliy tajribasi bilan erishilgan zarur bilim, koʼnikma va malakalar majmui;
professional standart — xodimga maʼlum bir kasbiy faoliyat turini, shu jumladan, maʼlum bir mehnat funktsiyasini bajarish uchun zarur boʼlgan malaka talablari;
professional taʼlim — taʼlim oluvchilarda maʼlum bir mutaxassislik va kasblar boʼyicha kasbiy kompetentsiyalarni shakllantiradigan va rivojlantiradigan uzluksiz taʼlim tizimi;
tabaqalashtirilgan taʼlim dasturi — Xalqaro tasniflagichning tegishli darajalariga muvofiq boshlangʼich, oʼrta va oʼrta maxsus professional taʼlimda kadrlar tayyorlash uchun kasb yoki mutaxassisliklarning murakkablik darajalari, oʼqitish muddatlari bir-biridan farq qiladigan taʼlim dasturi;