Allayarov A. I. O’rmonov H. B. O‘zbekistondagi ziyoratgoh obidalar

Shаyx Hаsаn Sаbroniy mаqbаrаsi. Xorazm viloyati Shovot tumanidagi meʼmoriy yodgorlik(XIV asr boshlari). Shayx hasan Sabroniy, rivoyatlarga koʼra, XII asrda yashagan; maqbara XIV asr boshlarida bunyod etilganligi aniqlangan. Toʼrtburchak tarhli (9,1x9,7 m) maqbara peshtoqgumbazli, bezaksiz; uning qurilishida yapaloq gʼisht (23x 23x3,5—4 sm) va ganch kirishmasidan foydalanilgan. Vayrona xrlida boʼlgan (gumbazi 1937 yilda qulab tushgan) maqbara XX asr 80 yillarida qayta qurilgan.¹³⁰

Shovodxoʼjа bobo mаqbаrаsi. Xorazm viloyati Urganch tumanidagi meʼmoriy yodgorlik (XVII—XVIII asrlar). Maqbara toʼrtburchak tarhli (8,4x7,33 m), peshtoqgumbazli, bir xona (goʼrxona, tarhi 5,22x5,20 m)dan iborat; bezaksiz. Goʼrxona va peshtoq binoning yaxlit shaklini hosil qilgan. Peshtoq yuqori tomon ingichkalashib borib, gʼishtin sharafalar bilan yakunlangan, yuzasining ikki yonlari yassi tokchalarga boʼlingan. 2 pogʼonali asosga oʼrnatilgan mahobatli gumbaz peshtoq bilan mutanosib. Goʼrxona ichi oddiy, xona devorlari ravoqli bagʼallar bilan birikib, yarimgumbazlar hosil qilgan, ularga muqarnaslar ishlangan. Maqbaraning tashqi tomonidagi gʼisht choklari pardozlangan, yagona bezagi — yon tomonlaridagi derazalariga oʼrnatilgan ganch panjaralar.¹³¹