Akademiyalıq xat Ekologiyalıq jurnalistika – jańa baǵdar ma? 1-adım

Akademiyalıq xat
Ekologiyalıq jurnalistika – jańa baǵdar ma?


1-adım. Insan óziniń sanalı qatnası arqalı basqa barlıq janzatlardan ajıralıp turadı, biraq insaniyat sanalı bolıwına qaramastan qorshaǵan átirapqa durıs qatnas jasamastan ayırım waqıtları sanalı túrde tábiyatımızǵa zıyanın tiygizedi. Lekin, sonı da aytıp ótiw kerek, túrli unamsız jaǵdaylardı júzege keltirip qoymastan olarǵa qarsı dawanı da adamzattıń ózi oylap tawıp kelmekte. Hárqanday máseleniń júzege shıǵıp, onnan xalıq wákilleriniń xabardar bolıwında ǵalaba xabar qurallarınıń áhmiyeti úlken. Óytkeni, qaysı ónimniń yáki qaysı hárekettiń átirapımızǵa zıyanlı ekenligin biz televedienie, radio yáki baspasóz maǵlıwmatları arqalı bilip alıwımız múmkin. Xalıqtı xabarlandırıw hám olardıń túsinigin arttıtırıw ushın eń kóp unamlı tásir jasaytuǵın faktor sıpatında da biz ǵalaba xabar quralların ayrıqsha atap ótsek boladı. Hár túrli ekologiyalıq jaǵdaylardıń júzege keliwi hám ekologiyalıq mashqalalardı jumsartıw boyınsha alıp barılıp atırǵan jumıslardı keń jámiyetshilik auditoriyasına jetkerip beriwde ǵalaba xabar qurallarınıń, sonıń ishinde, internet tarmaqlarınıń tutqan ornı ayrıqsha.