Қайта кўриб чиқилган минимал стандарт модель

Бреттон-Вудс халқаро конференциясида ташкил этилган икки муассаса: Халқаро валюта жамғармаси (ХВЖ) ва Халқаро тикланиш ва тараққиёт банки бўлмиш молия институтлари учун инвестицион моделнинг кераклиги уларнинг иқтисодий сиёсат юритиш­ларида намоён бўлади. Биринчидан, маълум мақсадларни амалга ошириш учун кредит қиймати ҳақида маълумотга эга бўлишлари кераклигидир. ХВЖ нуқтаи назаридан, тўлов балан­сидаги вақтинчалик дефицитни молиялаштириш учун керакли миқдордаги кредитни баҳолаш ҳисобланди. Бу эса, ўз навбатида, дефицитнинг миқдори ва давомийлигини баҳолаш керакли­гини англатади. Шу нуқтаи назардан, халқаро молия институтлари, хусусан Жаҳон банки учун инвестицион моделнинг аҳамияти, молиялаш­тирилаётган мамлакатда муайян мақсадга эри­шиш ва ишлаб чиқариш ҳажми ўсиши учун башорат қилишда намоён бўлади. Бу эса мам­лакатларда ишлаб чиқаришнинг ўсиши ва халқаро молия институтлари ажратаётган кредит линиялари ўртасидаги боғлиқлик тўғрисидаги билимлар кераклигини тақозо этади.
Иккинчидан эса инвестицион моделнинг аҳамияти, ҳозирги кунга келиб халқаро молия фондларининг мамлакатлар учун Тузилмавий тузатиш дастурлари (Structural Adjustment Programmes, SAPs) билан боғлиқ ҳисобланади. Чунки ёрдам ажратилаётган мамлакатнинг иқтисодиёти қандай ишлаётгани ва барча бошқа сиёсатнинг таъсири натижалари қандай бўлиши мумкинлиги асосида халқаро молия институт­ларининг инвестицион сиёсати тузилади¹.
Жаҳон банки гуруҳида энг кенг тарқалган ва фойдаланиладиган инвестицион модель 1973 йилда яратилган Қайта кўриб чиқилган минимал стандарт модель (Revised Minimum Standard Model, RMSM) ҳисобланади [12]. Халқаро валюта жамғармаси томонидан фойдаланиладиган моделнинг номи Молиявий дастур модели (Financial Programming Model, FPM) деб юрити­лади. Ҳозирги кунга келиб бу икки модель бир­лаштирилиб, улардан янги RMSM-X модели сифатида фойдаланилмоқда. Юқорида келтириб ўтилган умумий модель асосида мамлакатлар тўғрисидаги маълумотларга асосан ҳар бир мам­лакат учун алоҳида модель ишлаб чиқилади.