Aguero uchun kurashda London klubi favorit bo`lib turibdi

Aguero uchun kurashda London klubi favorit bo`lib turibdi

Yozda “Manchester Siti”dan erkin agent sifatida ketadigan hujumchi Serxio Aguero faoliyatini “Chelsi”da davom ettirishi mumkin.

Daily Mail`ning yozishicha, argentinalik 32 yoshli futbolchi Angliyada qolishni xohlamoqda. Shu bilan birga u “Manchester Siti” muxlislariga hurmat saqlagan holda “shaharliklar”ning asosiy raqiblari – “Manchester Yunayted” va “Liverpul”ga o`tmoqchi emas. Shu sababli London klubi asosiy variant bo`lib turibdi.

Ta’kidlanishicha, “Chelsi” Agueroni “Atletiko”da o`ynagan paytidayoq sotib olishga uringan.

Hujumchi bu mavsumda APLda 8ta bahsda maydonga tushib, 1ta gol urdi.

Zidan: “Ramosning jarohat olishida milliy jamoa ham, “Real” ham aybdor emas”

“Real” bosh murabbiyi Zinedin Zidan Ispaniya milliy jamoasida jarohat olgani sababli madridliklarning Chempionlar Ligasida “Liverpul” va La Ligada “Barselona” bilan o`yinlarini o`tkazib yuboradigan himoyachi Serxio Ramos haqida fikr bildirdi.

“Ramosning jarohati hech kimning aybi emas. Bunda na milliy jamoa, na “Real” aybdor emas. Bu – futbolning bizga yoqmaydigan bir qismi. Bunday holatni to`g`ri qabul qilishingiz kerak. Jarohatlarning oldini olish mumkin emas. Jamoamizda jarohatlanganlar juda ko`p.

Serxioning tezroq tiklanishini istaymiz. Uning “Real” uchun ham futbolchi, ham sardor sifatida qanchalik muhimligini bilamiz.

Serxioning doim yonimizda bo`lishini istaymiz, ammo hozir ixtiyorimizdagi futbolchilar haqida o`ylashimiz kerak. Oldindagi bahsda “Eybar” bilan o`ynaymiz va bu bellashuv – butun mavsum uchun muhim.

Ramos bilan yangi shartnoma bo`yicha muzokaralar? Bilmayman. Uning jarohatlari vaziyatga ta’sir qiladi, deb o`ylamayman. Serxioning “Real”da qolishini xohlayman”, – deya Zidanning so`zlarini keltiradi Marca.

Ma’lumot o`rnida, 35 yoshli Ramos bu mavsumda La Ligada 15ta o`yin o`tkazib, 2ta gol urdi.

Mbappe: “Ronaldu va Messi menda mavjud bo`lmagan yutuqlarga erishishgan. Ammo doim o`zimni eng zo`ri deb hisoblayman”

“PSJ” hujumchisi Kilian Mbappe dunyoning eng yaxshi futbolchisi bo`lishga urinishi haqida gapirdi.

“Maydonga tushganimda, o`zimga eng zo`r ekanligimni aytaman. Messi va Ronalduga qarshi o`ynadim. Ular mendan ko`ra sifatli futbolchilar. Ular menda bo`lmagan turli yutuqlarga erishishgan. Ammo men doim o`zimni eng zo`r deb hisoblayman, chunki shu orqali siz o`zingizga hech qanday chegara o`rnatmaysiz va eng yaxshi futbolni ko`rsatishga harakat qilasiz.

Albatta, ba’zida odamlar buni tushunmaydilar. Ushbu mavzu atrofida ma’lum bir to`siq bor. Bir-birimizga ego nima ekanligini tushuntira olmaymiz”, – deya Mbappening so`zlarini keltiradi RMC Sport.

Laporta va Rayola Holand bo`yicha muzokaralarda “Yuventus” futbolchisi transferini ham muhokama qilishdi

Agent Mino Rayola va “Barselona” prezidenti Joan Laporta o`zaro uchrashuvda nafaqat “Borussiya” D hujumchisi Erling Holandning, balki “Yuventus” himoyachisi Matteys de Ligtning transferini ham muhokama qilishgan, El Chiringuito TV.

Ma’lumot uchun, ikkala futbolchi ham italiyalik agentning mijozlaridir.

21 yoshli de Ligt bu mavsumda A Seriyada 16ta o`yin o`tkazib, gol urgani yo`q. U “Yuventus”ga 2019 yil yozida “Ayaks”dan o`tgan.

Gvardiola: “Kelasi mavsumda hujumchi sotib olmasligimiz ehtimoli yuqori”

“Manchester Siti” bosh murabbiyi Pep Gvardiola klubning bir necha kun oldin jamoadan ketishini e’lon qilgan hujumchisi Serxio Aguero o`rniga futbolchi sotib olishiga amin emas.

“Kelajakda nima bo`lishini bilmayman, ammo yuqori narxdagi forvardlarni sotib ololmaymiz. Bu mumkin emas. Barcha klublar moliyaviy muammolarni boshdan kechirishmoqda, biz ham bundan mustasno emasmiz.

Kelasi mavsumda hujumchi sotib olmasligimiz ehtimoli yuqori”, – deya Gvardiolaning so`zlarini keltiradi BBC.

Avvalroq “Manchester Siti” hujumchilar – Erling Holand (“Borussiya” D), Romelu Lukaku (“Manchester Siti”) va Harri Keynga (“Tottenhem”) qiziqish bildirayotgani xabar qilingandi.