Agrobiznesda innovatsion faoliyat

12.2-rasm. Karantin tadbirlarini o‘tkazish

Shundan kelib chiqib, xo‘jaliklarda chet eldan keltirilgan golshtin zotiga mansub chorva mollarining mahsuldorligi va saqlanishini belgilovchi asosiy omillar hayvonlarni saralab olishda ishtirok etadigan mutaxassislarning malakasi va bilimdonligi, shuningdek bevosita xo‘jalikda saqlash va ayniqsa boqish sharoitlari hisoblanadi. Bunda chorva molining nasli jiddiy ahamiyatga ega emas, zero golshtin zotiga mansub naslni yaxshilovchi buqalar urug‘idan butun dunyoda foydalaniladi.

O‘z-o‘zidan ravshanki, turli mamlakatlardagi va hatto bir mamlakatning turli hududlaridagi sut ishlab chiqaruvchilar har xil iqtisodiy va iqlim sharoitlarida ishlaydilar. yem-xashakning mavjudligi va qiymatida ham farqlar bor.
Har bir ishlab chiqaruvchining sut ishlab chiqarishni tashkil etish uslubi betakrordir, biroq hamma uchun bir bo‘lgan ko‘p sonli prinsiplar ham mavjud, zero ular sigir biologiyasiga asoslanadi. Jahonning deyarli barcha mamlakatlarida, barcha iqlim mintaqalarida sut ishlab chiqarishga ixtisoslashgan chorvachilikda yirik shoxli qoramolning ayni bir zotlaridan foydalaniladi. Ammo hayvonlar bir qit'adan boshqa qit'aga, bir mamlakatdan boshqa mamlakatga ko‘chirilganda, hatto mamlakatlar iqlim sharoitlariga ko‘ra o‘xshash bo‘lsa ham hayvonlar ularga moslashishi uchun vaqt va mutaxassislarning kuch-g‘ayrati talab etiladi.
Saqlash sharoitlarining o‘zgarishi natijasida yuz beradigan zo‘riqishlarga hayvonlar organizmining moslashish imkoniyatlari cheklangan. Organizm ichki muhiti dinamik barqarorligining saqlanishi doirasida moslashish jarayoni jiddiy zo‘riqish bilan bog‘liq va bu, hyech shubhasiz, mahsuldorlik darajasiga ta'sir ko‘rsatadi, ta'sir davomli bo‘lganda esa fiziologik funksiyalarning buzilishiga, ba'zan ularning izdan chiqishiga olib keladi.
Stress omillarining salbiy ta'sirini bartaraf etishning uch yo‘li mavjud:
●stressga chidamli hayvonlarni seleksiya yo‘li yaratish va stressga chidamlilik mezoniga ko‘ra saralab olish;
●stressga qarshi profilaktika va davolash ishlarini olib borish;
●texnologiyani hayvonlarning biologik ehtiyojlariga yaqinlashtirish maqsadida takomillashtirish.
G‘arbiy yevropa mamlakatlarining aksariyatida sut ishlab chiqarishga ixtisoslashgan chorvachilikni rivojlantirish tahlili va Shimoliy Amerika tajribasi uchinchi bandni bajarish qolgan ikki bandning dolzarbligini sezilarli darajada pasaytirishidan dalolat beradi. Bundan xulosa shuki, asosiy e'tibor sigirlarni saqlash sharoitlarini yanada yaxshilashga va ularni fiziologik ehtiyojlariga muvofiq sifatli, muvozanatga solingan yemlar bilan ta'minlashga qaratilishi lozim.