Abdulla qodiriy nomli jizzax davlat pedagogika instituti pedagogika ta

UMUMIY XULOSA VA TAVSIYALAR

Bizga ma’lumki, hozirda mamlakatimizda qizlarga, ularning ilm olish va kasb-hunar egasi bo’lishiga katta e’tibor berilmoqda. Lekin bularning o’zi qizlarning kelgusi hayotlarining farovon bo’lishligi uchun yetarli emas, balki ularga oilaviy hayot saboqlaridan ham ma’lumotlar berishga to’g’ri keladi. Chunki mustahkam oiladagina farzandlarga xohlagancha yashashi uchun imkon yaratiladi. Kuzatishlardan ma’lum bo’ladiki, oila qurgan ayrim qizlarning oilaviy hayotga tayyor emasliklari, o’zaro munosabatlarida kelishmovchilik, bir-birini hurmat qilmaslik, jiddiy mas’uliyat hissining yetishmasligi, yengil-yelpi hayot kechirishga o’rganib qolish, turli fiziologik va psixologik xususiyatlarini yaxshi bilmaslik xolatlari ko’rinadi. Demak, qizlarni oila munosabatlariga psixologik tayyorlashda ushbu jihatlarga e’tiborni qaratish zarurati yuzaga keladi:

1. Ta’lim muassasalarida qizlarga fanlarini o’qitish bilan barobarida, o’zaro munosabatlarda axloqiy munosabatlarni to’g’ri shakllantirish va to’g’ri yo’lga qo’yishni o’rgatish;

2. Ularga yuksak insoniy his tuyg’ularni anglash va qadrlashni o’rgatish;

3.Qizlarda ijtimoiy, huquqiy, biologik, ma’naviy jihatdan bilimdon bo’lishlariga oid ilmiy tushunchalar va haqqoniy tasavvurlarni hosil qilish;

4. Qizlarni jismoniy baquvvat, sog’lom, yuqori madaniyatli, barqaror qadriyatli, xulq-atvorli, irodali shaxs sifatida shakllanishiga yordam berish;

5. Oilaning yuksak qadriyat ekanligini anglashga, oilada o’zaro burchni yuqori qadrlashga o’rgatish.

Sog’lom oila vujudga kelishi uchun, eng avvalo, jamiyat va davlat qayg’urishi, shunga zamin yaratib berishi lozim. Shundagina mustahkam oila dunyoga keladi. Oila sog’lom bo’lsa, jamiyat sog’lom, mamlakat qudratli, yurt tinch-osoyishta bo’ladi. Hozirgi kunda oilaning muqaddasligi hamda nikoh mas’uliyati bo’yicha turmush qurayotgan yoshlarning bilim va tushunchalarini boyitishga alohida e’tibor qaratilmoqda.

Xususan, oila qurish har bir inson hayotida ulkan hodisa ekanligi, bu masala shaxsiy, xususiy doiradan chiqib, ijtimoiy ahamiyat kasb etishi tushuntirilayapti.

Ikkinchidan, voyaga yetayotgan o’smirlar, avvalo, qizlarimiz ongida oila mas’uliyati, ularni turmush qurishga tayyorlash bo’yicha muayyan ishlar olib borilmoqda.

Uchinchidan, yosh oilalarning huquqiy savodxonligini tubdan yaxshilash, oilada bolaning qonuniy huquq va manfaatlari himoyasi bo’yicha tadbirlar tashkil qilinmoqda.

Chunonchi, davra suhbatlari, seminarlarda mutaxassislar yordamida oilada qiz bolalarni oilaviy hayotda tarbiyalash, oila qurishning ma’naviy-axloqiy, ijtimoiy-huquqiy jihatlari, balog’at yoshi bilan bog’liq biologik, fiziologik o’zgarishlar hamda bu davrda nimalarga e’tibor berish lozimligi, qarindosh-urug’chilik asosida oila qurishning zararli oqibatlari, qolaversa, sanitariya, shaxsiy gigiyena masalalari batafsil tushuntirib berilmoqda.