Abbatisa – ayollar katolik monastirlarining boshqaruvchilari. Abbatlik

Komita – ilk bolgar podsholigi davrida ma’muriy hududlar boʻlib, ularni boshqarish uchun podsho hokimlar tayinlagan.
Komitetlar – VI asrda Vizantiyada armiya harbiy qismlaridan birining nomi.
Kommendatsiya (lot.commendare – tavsiya qilmoq, tayinlamoq) – Gʻarbiy Yevropada ilk oʻrta asrlarda nisbatan badavlat boʻlgan kishining homiyligi ostiga oʻtish. Uning ikkita asosiy turi boʻlgan: 1) vassalning oʻz senorining hokimiyatini tan olish haqidagi akt, buning uchun qasamyod qilishlari lozim boʻlgan (vassal shu qasamyod tufayli yer-mulk – benefitsiy yoki feod olgan); bunday K. vassallik munosabatlarini shakllantirgan; 2) xonavayron boʻlgan erkin dehqonlarning yirik yer egasi qaramligiga tushib qolishi. “Ojiz” kishining “kuchli” va boy kishining homiyligi ostiga oʻtishi avval yerga nisbatan amalga oshgan, keyinchalik ular shaxsiy qaramlikka tushib qolgan.
Kommuna (shahar) (umumiy) – oʻrta asrlarda oʻz-oʻzini boshqaruvchi shahar. Shahar–respublika.
Kommuna huquqi uchun kurashlar – Gʻarbiy Yevropada X-XIII asrlarda shaharliklarning senorlarga qarshi oʻz-oʻzini boshqarish va erkinlik uchun kurashlari. Avval boshda shaharliklar feodal zulmlarni cheklash va soliqlarni qisqartirishni talab qilib chiqishgan. Keyinroq siyosiy vazifa – shaharning oʻz-oʻzini boshqarish uchun kurashga aylandi. Kurashlar feodal tizimga qarshi emas, u yoki bu shahar senorlariga qarshi olib borildi. Janubiy Fransiya shaharliklari ortiqcha qon toʻkishlarsiz kommuna huquqini qoʻlga kiritgan (IX-XII-asrlar). Shimoliy Fransiya shaharlari (Amyen, Lan, Bove, Suasson va boshqalar) va Flandriya (Gent, Bryugge, Lill) asosan qurolli kurash yoʻli bilan shu huquqni qoʻlga kiritganlar. Bunday huquqni qoʻlga kiritgan shaharlar rentadan va senor majburiyatlaridan xalos boʻlishgan. Uning oʻrniga senorga katta boʻlmagan summadagi pul rentasini toʻlashgan, urushlar vaqtida shaharliklar oʻz harbiy otryadlarini se’norlariga yordam berishga yuborgan. Ba’zan kommuna huquqlari uchun kurash uzoq davom etgan (mas. Lan shahri oʻzini oʻzi boshqarishi uchun 200 yil davomida kurash olib borgan). Shimoliy va oʻrta Italiya shaharlari (Venetsiya, Genuya, Siyena, Florensiya, Lukka, Ravenna, Bolonya) IX-XII asrlarda K.H.ini qoʻlga kiritgan, XII-XIII asrlarda Germaniyada imperiya shaharlari deb ataluvchi shaharlar paydo boʻldi, ular rasman imperatorga boʻysingan boʻlsada, ammo amalda mustaqil shaharlar hisoblangan (Lyubek, Nyurenberg, Frankfurt na-Mayne va boshqalar).