Abbatisa – ayollar katolik monastirlarining boshqaruvchilari. Abbatlik

Anglo-sakson haqiqatlari – VII–IX asrlardagi anglo-saksonlardagi odatiy huquqlar qaydlari. Boshqa varvar haqiqatlaridan farqli ravishda (ular lotin tilida bitilgan), A.H. qadimiy ingliz tilida yozilgan hamda ularda Rim ta’siri sezilmaydi. Kentliklarning “Etelbert qonunlari” (VII asr boshlari), “Xlotar va Edrik qonunlari” va “Uitred qonunlari”da (VII asr oxiri) jamiyatning zodagonlar (erllar, gezitlar) va oddiy erkin qabiladoshlarga (kerllar) ajralganligini kuzatish mumkin. Uesseksliklarning “Ine qonunlari”da (VII asr oxiri) qirolining yer-mulki koʻpayganligi, uning va cherkovning xizmatkorlari zodagonlarga qaramlikka tushib qolgan sobiq erkin jamoachilar hisobiga oshib borganligi ma’lum boʻladi. Yana qirol xizmatidagi amaldorlari boʻlgan tenlar bilan dehqonlar oʻrtasidagi ijtimoiy tafovut oshib borgan. IX asr oxirlariga mansub boʻlgan Uesseksning “Alfred qonunlari” boʻlsa endi Alfred hokimiyati ostiga kiruvchi barcha hududlar uchun amalda boʻlgan qirollik va cherkov farmonlari toʻplami koʻrinishini kasb etib boʻlgandi.
Anju –Luaraning quyi havzasida, Fransiyaning shimoli-gʻarbida joylashgan viloyat, IX asrdan boshlab graflikka aylangan. 1115-yilda Anju grafi boʻlgan Genrix II Plantagenet Angliya qiroli boʻldi. A. boʻlsa Fransiyadagi Angliya mulklaridan biriga aylandi. 1202-1204-yillarda A. fransuz qiroli Filipp II Avgust tomonidan tortib olindi. 1268-yilda A. grafi Karl Sitsiliya qirolligini (Neapol va Sitsiliya) bosib oldi va u yerda Anjuylar sulolasi hukmronligini oʻrnatdi. Sitsiliyada bu sulola 1282-yilgacha (ya’ni “Sitsiliya tungi ibodati”gacha), Neapol qirolligida boʻlsa 1442-yilgacha hukmronlik qildi. 1360-yilda A. gersoglikka aylandi. 1481-yilda fransuz qiroli Lyudovik XI (1461-1483) A.ni qirollik domeni tarkibiga qoʻshib oldi.
Anjuylar hokimiyati (derjava) – Genrix II Plantagenetning La-Manshning ikki tomonida – butun Shimoliy, Gʻarbiy va Janubi-Gʻarbiy Fransiya, shuningdek Angliyani qamrab olgan hukmronligining shartli nomlanishi.
Anjuylar sulolasi – Gʻarbiy Yevropaning bir qancha davlatlarida Fransiyaning Anju urugʻidan kelib chiqqan qator qirollik sulolalarining umumiy nomi. Angliyada Plantagenetlar A.S. hisoblangan. Janubiy Italiyada A.S. 1268-yildan 1442-yilgacha, Vengriyada 1308-1387. Polshada–1370-1382 va 1384-1385-yillarda hukmronlik qilgan.