A. M. Karimova, D. M. Malikova pul va banklar

Chet el kapitali ishtirokidagi bank - chet ellik investorlarning ishtiroki bank ustav kapitali umumiy summasining kamida 30% ini tashkil etadigan bank. Bunday bankning ustav kapitalini shakillantirishda rezidentlar va norezidentlar, jismoniy va yuridik shaxslar, shuningdek, norezident banklar ishtirok etishi mumkin.
Eksport - 1. Tovarlar, xizmatlar, investisiya, qimmatli qog’ozlar, texnologiyalar va boshqalarni tashqi bozorga chiqarish. 2. Mamlakatda ishlab chiqarilgan mahsulotlar, texnologiyalar va xizmatlarni chet mamlakatlarga chiqarish va tashqi bozorda sotish tushuniladi.
Eksport - import banki - xorijga mahsulot chiqarish va xorijdan mahsulot keltirish jarayonini mablag’ bilan ta’minlash asosida faoliyat yurituvchi bank.
Elektron pul - elektron kartochka boʻlib, uning xotirasiga egasining hisobidagi pul summasi yozilgan boʻladi. Hisob- kitoblarni elektron hisoblash mashinalari yordamida bajarish uchun qoʻllaniladigan kredit pullarning eng soʻnggi turidir. Pul toʻlash uchun elektron kartochka EHMga kiritiladi, kartochkadan avtomatik ravishda toʻlanishi zarur boʻlgan pul summasi oʻchiriladi va bu summa pul oluvchi elektron hisobiga yozib qoʻyiladi.
Emissiya - 1. Qog’oz pullarning g’aznaxonaga yoki boshqa davlat moliya organlari tomonidan muomalaga chiqarilishi. 2. Barcha shakldagi pul belgilarini muomalaga chiqarish.
Emissiya (markaziy bank uchun) - qog’oz va tanga pullarning, davlat qimmatli qog’ozlarini Markaziy bank yoki moliya organlari tomonidan muomalaga chiqarilishi.
Emissiya (tijorat banklari uchun) - bu tijorat banklari tomonidan qimmatli qog’ozlarni muomalaga chiqarish.
Emissiya tizimi - bu muomalaga bank biletlari, xazina biletlari, qog’oz va tanga pullar, qimmatbaho qog’ozlarni chiqarishdir. Rivojlangan mamlakatlarda bank biletlari emissiyasi Markaziy banklar tomonidan, xazina biletlari va tangalar esa qonunda belgilangan emissiya huquqiga asosan, xazina muassasalari tomonidan chiqariladi.