9-Мавзу: Печларнинг турлари, тузилиши ва ҳисоби. Трубали печлар, уларнинг ишлаш принципи ва тузилиши. Асосий иш кўрсаткичлари ва конструктив элементлари

47-расм. ФГМ-4 типидаги газ-мазут универсал форсункаси
1-Уюрма ҳосил қилиш мосламаси; 2-мосламани маҳкамлагичи; 3-ҳаво заслонкаси; 4-заслонка дастаги; 5-буғ-суюқлик камераси; 6-ёқилғи вентили; 7-ҳаво туйнуги; 8-ҳаво регистри; 9-айлана газ коллектори; 10-газ коллектори наконечниги.

Тутун трубалари ва мўрилар

Тутун газлари печдан мўри тутун трубалар орқали атмосферага чиқарилади. Тутун трубалар печларнинг ишлаши учун зарур бўлган сўришни таъминлайди. Тутун трубалар диаметри шундай қилиб танланадики, уларда газ тезлиги 4-6 м/с дан ортмаслиги керак. Талаб қилинган сўриш ҳаво ва тутун газлар зичликлари фарқи ҳисобига вужудга келади. Шунингдек, сўриш труба баландлигига, тутун газлар ва атмосфера ҳавоси температураларига боғлиқ. Тутун трубалар печ ўтхонасида ҳосил қиладиган сийраклашиш 15-20 мм.сув. уст.ини ташқил этади.
Ҳозирги вақтда ишлатиладиган тутун трубалари Ст.3 маркали пўлатдан тайёрланган. Конус шаклидаги металл трубалар нормалга мос равишда 30,35 ва 40 м баландликка, чиқишда 2000 мм гача ва асосида 3200 мм.гача диаметга эга. Улар фундаментга 16 дона фундамент болтлари ёрдамида маҳкамланади.
Тутун трубаларининг шамол таъсиридаги тебраниш частотаси уларнинг хусусий тебраниш частотаси билан мос келади. Шамолнинг муайян тезлигида трубалар резонансга тушиб қолади ва уларнинг тебраниш амплитудаси ортиб кетади. Бу ҳодиса сезиларли динамик кучланишни ҳосил қилади.
Тутун трубаларининг пастки қисми ички томонидан ўтга чидамли ғишт билан қопланади. Қопламанинг баландлиги тутун газлари температурасига боғлиқ бўлиб, одатда 10-15 м.ни ташқил этади. Қоплама пўлат трубалар тебранишини сўндиришга хизмат қилади.
Тутун трубалар юпқа девори тутун газлари таъсирида коррозияланиши мумкин. Ҳозирги пайтда темир-бетон трубалар ишлаб чиқаришга жорий қилинмоқда.
Мўрилар конвекцион камерани тутун трубалар билан боғлайди. Улар ғишт, ғишт ва темир-бетон блоклардан терилади. Кўрикдан ўтказиш, таъмирлаш учун уларда люклар ўрнатилади. Мўриларнинг барча каналлари буғ билан ўт ўчириш тизими билан таъминланган. Тутун трубаларнинг сўришини ростлаб туриш учун унинг пастки қисмида текис тўсиқлар ўрнатилган.