8-dekabr O'zbekiston Respublikasi Konstitutsiyasi kuni

8-dekabr – O'zbekiston Respublikasi Konstitutsiyasi kuni

08.12.2013 02:16:58 • "UzReport"
O’zbekiston Respublikasi mustaqillikning dastlabki kunlaridanoq o’zining davlat ramzlarini yaratishga alohida e'tibor bilan qaradi. Oliy Kengash Davlat bayrog’i, Davlat gerbi va Davlat madhiyasi haqida qonun loyhalarini tayyorlash, Oliy Kengash sessiyasi muhokamasiga taqdim etish to’g’risida qaror qabul qildi. Mustaqil O’zbekiston Respublikasining Konstitutsiyasi qabul qilinganligini nishonlash maqsadida Konstitutsiya qabul qilingan kun – 8-dekabr umumxalq bayrami - O’zbekiston Respublikasining Konstitutsiyasi kuni deb e'lon qilinindi.
Bu yil respublika bo’ylab O’zbekiston Respublikasining Konstitutsiyasi qabul qilinganligining 21 yilligi nishonlanmoqda. Yurtimizning barcha aholisini mazkur umumxalq bayrami munosabati bilan chin dildan muborakbod etamiz.
Mamlakatimizda milliy huquqiy davlat qurish, demokratik jamiyat barpo etish, bozor munosabatlarini shakllantirish kabi dolzarb vazifalar mustaqil O’zbekiston Konstitutsiyasini ishlab chiqishni taqozo etardi. Shuningdek, O’zbekiston Respublikasining xalqaro huquq subyektiga aylanishi, mustaqil davlat sifatida jahonga tanilishi ham Konstitutsiya qabul qilinishini talab qilardi.
Konstitutsiyaviy komissiya O’zbekiston Respublikasining Konstitutsiyasini ishlab chiqish ustida qariyb 2,5 yil ishladi. Konstitutsiya loyihasini ishlab chiqishda konstitutsiyaviy rivojlanishning jahon tajribasi o’rganildi, inson huquqlari, demokratiya va qonunchilik sohasida jahonda qo’lga kiritilgan yutuqlar hisobga olindi. Milliy davlatchiligimizning tajribasi, Amir Temur va boshqa allomalarimizning davlatni idora qilish sohasidagi g’oyalari yangi Konstitutsiyaga asos qilib olindi. Shunday qilib, 1992- yil 8- dekabr kuni O’zbekiston Respublikasining Konstitutsiyasi qabul qilindi.
O’zbekiston Respublikasining Konstitutsiyasi 6 bo’Iim, 128 moddadan iborat. U „Mustaqillik Deklaratsiyasi", „O’zbekiston Respublikasining davlat mustaqilligi asoslari to’g’risida"gi Qonunda mustahkamlangan tamoyillar va g’oyalarni o’zida to’la mujassamlashtirdi, ularni rivojlantirdi.
O'zbekistondagi boshqa ijtimoiy yangiliklarni www.UzReport.uz da o'qing