8-9 темалар. Tindiriw hám shóktiriw

Qıya tosıqlı, yarım úzliksiz tındırǵısh. Suspenziya shtutser arqalı qurılmaǵa kirgiziledi hám qıya ornatılǵan tosıq 2 ler járdeminde gezekpe-gezek joqarıdan tómenge hám tómennen joqarıǵa qarap baǵdarlanadı (3.4-súwret).
Qıya tosıqlar qurılmada suspenziyanıń háreket dawamlılıǵın hám tındırıw júzesin joqarılatadı. Payda bolatuǵın shlam bolsa, bunker 3 lerde jıynaladı hám tolıp shıqqannan soń kranlar járdeminde shıǵarıp jiberiledi.
Tazalanǵan suyıqlıq tındırǵıshtıń joqarǵı bóliminde ornatılǵan shtutser arqalı shıǵarıladı.
Ximiya hám azıq-awqat sanaatlarında úzliksiz isleytuǵın tındırǵıshlar keń kólemde qollanılmaqta.
Eskek aralastırǵıshlı, úzliksiz isleytuǵın tındırǵısh. Ádette bunday túrdegi tındırǵısh konus tárizli túp 5 hám cilindrli qabıq 6 dan, hámde qurılmanıń joqarı bólegindegi saqıyna tárizli tarnaw 1 den quralǵan boladı (3.5-súwret). Shıǵarıw lyuki 4 ge shókpeni jetkerip beriw ushın qıya pátpalekli aralastırǵısh 2 de bir neshe eskekler ornatılǵan boladı. Aralastırǵısh 0,02...0,5 min^-1 jiyiligi menen aylanadı. Truba járdeminde suspenziya cilindrli qabıq ortasına úzliksiz ráwishte jetkeriledi. Tazalanǵan suyıqlıq saqıyna tárizli tarnawǵa quyıladı hám soń tındırǵıshtan shıǵarıladı. Payda bolǵan shlam diafragmalı nasos járdeminde qurılmanıń tómengi bóliminde sorıp alınadı. Eger shlam quramındaǵı dispers faza qımbat yamasa kelesi texnalogiyalıq processler ushın jaramlı bolsa, ol qayta isleniwge jiberiledi.
Bul túrdegi tındırǵıshlarda tıǵızlıǵı bir tegiste bolǵan shókpelerge hám onı nátiyjeli suwsızlandırıwǵa erisiwge boladı. Eskekli tındırǵıshlar kemshiligi: bul olardıń qopallıǵı.


Kóp qabatlı tındırǵısh. Bunday qurılmalar úzliksiz isleydi hám bir-biriniń ústine ornatılǵan bir neshe eskekli tındırǵıshlardan ibarat (3.6-súwret). Hár bir qabatlar arasında konus tárizli tosıqlar jaylastırılǵan. Bul tosıqlar sebepli tındırǵısh júzesi ádewir kóbeyedi hám nátiyjede qurılma qolaylı boladı.