79-son umumiy o’rta ta’lim maktabining Biologiya fani o’qituvchisi Lutfullayev Axliddinning,,havaskor biolog” nomli

2014-yili O‘zbekistonda 660 ta asalarichilik subyekti tashkil qilinadi
2013-yilda asalarichilik bilan 8 700 dan ortiq tadbirkorlik subyekti shug‘ullangan bo‘lsa, joriy yilda yana 660 dan ortiq subyekt tashkil etilishi rejalashtirilgan. Bu haqda O‘zbekiston Qishloq va suv xo‘jaligi vazirligi tizimidagi O‘rmon xo‘jaligi bosh boshqarmasi ma’lumotlariga tayanib O‘zA xabar berdi.
A yni vaqtda mamlakatda asalari naslchiligi bilan shug‘ullanuvchi 20 ga yaqin xo‘jalik faoliyat yuritmoqda. Yakkabog‘ tumanidagi “Umarxo‘ja Karimovich” naslchilik xususiy firmasi rahbari Karim Xonnazarov bu ishga qo‘l urgan tadbirkorlardan biri. U yetakchilik qilayotgan korxonada karpat zotli, sovuqqa chidamli va mahsuldor bolari oilalari ko‘paytirilib, dehqon va fermer xo‘jaliklariga yetkazib berilmoqda.
– O‘tgan yili shartnoma asosida 2,5 ming dona karpat zotli asalari va 500 paket bolari oilasi yetkazib berdik, – deydi K. Xonnazarov. – Joriy yilda 5 ming asalari oilasini eksport qilish uchun shartnoma imzoladik. Farzandlarim bilan 400 asalari oilasini parvarishlab, xalqimiz dasturxoniga yiliga 12 tonna asal yetkazib bermoqdamiz.
Ushbu mahsulotning asosiy qismi Farg‘ona, Jizzax, Toshkent, Qashqadaryo, Buxoro, Surxondaryo viloyatlarining tog‘ va tog‘ oldi hududlarida yetishtirilmoqda. Shu bois mazkur viloyatlarda mahsulotni qadoqlash hamda zarur jihozlar ishlab chiqarish sexlarini tashkil etish doimiy e’tiborda.
– Sohaga qaratilayotgan alohida e’tibor bois asalarichilik izchil rivojlanmoqda, – deydi O‘rmon xo‘jaligi bosh boshqarmasi bo‘lim boshlig‘i Turg‘un Ibrohimov. – Tarmoqni tizimli rivojlantirish uchun tegishli idoralar bilan hamkorlikda subyekt pasporti ishlab chiqildi. Unda barcha ma’lumotlar, jumladan, o‘tgan yilda asalari oilasi qancha edi, joriy yilda qanchaga ko‘paydi, qanday jihozlar zarurligi, arilarni qanday dorilash ishlari o‘tkazilgani kabi ma’lumotlarning yillik ko‘rsatkichi qayd etiladi. Bu hujjat xo‘jalikning mahsulot ishlab chiqarish hajmining ko‘paygani yoki kamaygani hamda ehtiyojlarini aniqlash va monitoring yuritishda qo‘l keladi.
– Joriy yildan asalarichilik xo‘jaliklari uchun zarur jihozlar ishlab chiqarish sexi va savdo do‘koni faoliyatini yo‘lga qo‘ydik, – deydi Jizzax shahridagi “Omon Zomin asali” mas’uliyati cheklangan jamiyati rahbari Erkin Nazarov. – Shu bilan birga, 1 200 asalari oilasi parvarishlab, har yili aholi dasturxoniga o‘rtacha 25 tonna asal yetkazib beramiz. Bolari bir kilogramm asal to‘plash uchun uyasidan 120 ming marta chiqib, 400 ming kilometr masofadagi millionlab gulning nektarini yig‘adi. Asal qaysi faslda va qanday o‘simlik gullaridan yig‘ilgani, qanday tabiiy sharoitda yetishtirilganiga qarab rangi, hidi va ta’mi bilan farqlanadi. Eng yaxshisi tog‘ asalidir. Chunki u turli dorivor gullardan olinadi. Shaftoli, olma gulidan to‘plangan bolning ham sifati yuqori bo‘ladi.
Sog‘lom bola yilida yurtimizda asalarichilik bilan shug‘ullanayotgan subyektlar faoliyatini yanada rivojlantirish va iqtisodiy qo‘llab-quvvatlash maqsadida 45 mingdan ko‘proq asalari qutisi, qariyb 400 ming ramka va 430 to‘plamdan ziyod zarur jihozlar, dori-darmon, maxsus kiyim-kechak yetkazib beriladi. Shuningdek, banklar tomonidan 3 milliard so‘m miqdorida kredit mablag‘larini ushbu maqsadlar uchun yo‘naltirish belgilangan.