7-mavzu: missionerlik va prozelitizm: tarix va bugun, targ’bot usullari reja

Missionerlar bolalar orasida ham ish olib bormoqda.
Missionerlar o‘zlari haqida ijobiy tasavvurni shakllantirish va shu asnoda o‘z faoliyatlarini kengaytirish maqsadida maktab yoshidagi bolalar bilan ishlashga ham alohida e’tibor bermoqdalar. Jumladan, bolalar uchun yozgi oromgohlar tashkil etish orqali tegishli e’tiqodiy ta’lim-tarbiyani amalga oshirishdan keng foydalanilayotganini ta’kidlash zarur. Masalan, bugungi kunda «Xalqaro xristian lagerlari» assotsiatsiyasining MDH va Boltiqbo‘yi mamlakatlarining 7 tasida, jumladan, Rossiyada -96, Latviyada -10, Belarus Respublikasida -5, Estoniyada -3, Qirg‘iziston, Litva va Finlyandiyada -1 tadan lageri ish olib bormoqda. Faoliyati tugatilgan Nukusdagi «Emanuel» cherkovi tomonidan tuzilgan lager misolida bunday yo‘nalishdagi harakat O‘zbekistonda ham kuzatilganini qayd etish lozim.
SHu narsa e’tiborga loyiqki, Qozog‘istondagi “Hosil o‘rib olish cherkovi” ning “Niva” oromgohida so‘nggi 5 yil davomida ko‘pchiligi ota-onasi yo‘q yoki kam ta’minlangan oilalar farzandlari bo‘lgan 3 mingdan ortiq bola dam olgan. Oromgohdagi dastur va rejalar shunday ishlab chiqilganki, mavsum oxiriga borib unda dam olgan bola xristianliknini qabul qiladi.
YOzgi ta’til davrida bolalarni dam olish joylariga qisqa muddatga olib chiqish, cherkov hududida bir necha smenali, kamida 2 mahal ovqat beriladigan kunduzgi dam olish lagerlari tashkil etish ham missionerlar faol foydalanadigan usullardan hisoblanadi. Odatda, bunday amaliyot cherkovga qatnaydigan fuqarolarning bolalari uchun tashkil etilgani haqida hamma joyda ochiq-oshkor e’lon qilinadi ham. Ammo aslida bunday harakatlar “e’tiqodiy tarbiyadan chetda qolayotgan bolalar” uchun mo‘ljallangani hech kimga sir emas. CHerkovga ibodatga keladiganlar orqali mahalla va maktablarda bolalar lagerlariga bepul yo‘llanma borligi, dam olish davrida turli to‘garaklar faoliyat ko‘rsatishi, bolalarning dam olishi mazmunli o‘tishi, qadimiy joylarga ekskursiyalar tashkil etilishi haqidagi e’lon-da’vatlarning tarqatilishi ham shunday xulosa chiqarish imkonini beradi.
CHerkovlarda bolalar uchun mo‘ljallangan «yakshanba» maktablari tashkil etish, bunday maktablarga jalb qilinganlar ishtirokida turli tadbirlar o‘tkazish, xristianlik ruhi bilan yo‘g‘rilgan spektaklllar qo‘yish va muayyan tayyorgarlikdan o‘tgan tarbiyalanuvchilardan masihiylikka da’vat qiluvchi turli adabiyotlarni tarqatishda faol foydalanishga intilishni ham bolalar orasida olib borilayotgan missionerlikning o‘ziga xos ko‘rinishi sifatida qayd etish mumkin.
Missionerlar shuningdek, jamiyatimizda bolalar huquqlarini himoya qilish, aqli zaif bolalar, kasallar uchun “inklyuziv ta’lim”ni tashkil etish, o‘smirlarni narkotiklardan himoya qilishdek yo‘nalishlarda turli shakl va mazmunda amalga oshirilayotgan loyihalar ruhiga moslashishga va shu yo‘l bilan go‘yoki, ularning faoliyati mamlakatimizda olib borilayotgan ishlarga hamohangligini ko‘rsatishga intilmoqdalar. Bunday harakatlar aslida fuqarolarning hushyorligini yo‘qotish va shu yo‘l bilan g‘araz maqsadlarga erishishga qaratilgani hech kimga sir emas.