6-mavzu. Axborot tizimlarining tushunchasi

6-mavzu. AXBOROT TIZIMLARINING TUSHUNCHASI.

1. 
   Axborot tizimi haqida umumiy tushuncha.
   
2. 
   Axborot tizimining dasturiy ta`minoti.
   
3. 
   Avtomatlashtirilgan axborot tizimining tasniflanishi.
   
4. 
   Tashkilotni boshqarishning avtomatlashtirilgan axborot tizimi
   

Tayanch iboralari: Axborot tizimi, avtomatlashtirish, tizim tasnifi, tarkibi, tendensiya, axborot, tizim.


1. Axborot tizimi haqida umumiy tushuncha.
Axborot texnologiyasi - axborotni to`plash, saqlash, izlash, unga ishlov berish va uni tarqatish uchun foydalaniladigan jami uslublar, qurilmalar, usullar va jarayonlar;
Axborot tizimi - axborotni to`plash, saqlash, izlash, unga ishlov berish hamda undan foydalanish imkonini beradigan, tashkiliy jihatdan tartibga solingan jami axborot resurslari, axborot texnologiyalari va aloqa vositalari.
ATlarni keng ma`noda axborotni qayta ishlaydigan ixtiyoriy tizimni tushunish mumkin. Tadbiq etish sohasiga qarab, ATlar ishlab chiqarish sohasida, ta`lim sohasida, sog`liqni saqlash sohasida, xarbiy sohada va boshqa sohalarda ishlatiladigan tizimlarga ajratish mumkin<sup>1</sup>.
Axborot tizimi- boshqarish funksiyasini amalga oshirish uchun xodimlarni turli xil axborotlar bilan ta`minlovchi ob`yekt haqidagi axborotlarni yig`ish, qayta ishlash, uzatish va saqlash bo`yicha ma`lumotlar va kommunikatsiyaviy tizimni o`zida namoyon etadi.
Iqtisodiy axborot tizimi nima ekanligini tushunib olish uchun eng avvalo uning iqtisodiy ob`yektni boshqarish tizimidagi tutgan o`rnini aniqlab olish lozim. Bu ob`yekt moddiy va nomoddiy ishlab chiqarish bilan bog`liqdir.
Axborot tizimi quyidagi xususiyatlariga ko`ra belgilanadi:
a) har qanday axborot tizimi tahlil qilinishi, tizim tuzilishining umumiy tamoyillari asosida qurilishi va boshqarilishi mumkin;
b) axborot tizimi dinamik va rivojlanuvchandir;
v) axborot tizimini tuzishda tizimli yondoshuvdan foydalanish zarur;
g) axborot tizimining chiqarish mahsuloti asosida qarorlar qabul qilinadi;
d) axborot tizimida axborotni qayta ishlashning "inson-kompyuter" tizimi sifatida qabul qilish lozim.
Avtomatlashtirilgan axborot tizimiga quyidagilar kiradi: odam (xodim), texnik vositalar, axborot va dasturiy ta`minot. Ular birgalikda boshqaruv usullari uchun ma`lumotlarni qayta ishlaydi (1-rasm).