6-маьруза Қурилиш композицион полимер материаллар ва уларнинг турлари. Энергия ва ресурс тежамкор технологиялари – валцовкалаш, каландрлаш, экструзиялаш, пресс-қолиплаш, штамповкалаш ва бошқА. Хоссалари

Ускуналарнинг буюм ва қисмлари пластмассалардан тайёрланган дераза ва эшик дасталари, йиғма мебел фурнитуралари, дераза жалюзалари ва бошқа маҳсулотлар киради. Улар турли шаклларда ва рангларда бўлиши мумкин. Бу буюмлар рангли металл сарфини кескин камайтиради.

Қувурлар. Пластмасса қувурлар полиэтилен, поливинилхлорид, полипропилен каби термопластлар ва шишапластик қувурлар реактопластлар (полиэфир ва бошқ.) асосида олинади.

Ҳозирги кунда агрессив муҳитларда ишлашга мўлжалланган, фенол-формалдегид, карбамид-формалдегид, фуран смоласи ва ш.к. асосида тайёрланган полимерқоришма ва полимербетон қувурлар 6 дан 150 мм гача диаметрда чиқарилади, деворларнинг қалинлиги 2-8 мм. Улар 1,2 МПа гача босим остида ишлашга мўлжалланган. Улар мустаҳкам, сув ва агрессив муҳитларга чидамли, эластик, енгил, ички юзаси силлиқ ва минерал моддалар йиғилиб қолмайди. Термопласт қувурларни осон пайвандлаб бириктириш мумкин. Уларда сув чўян қувурлардагига нисбатан равон оқади (гидравлик қаршилик кичик бўлади). Бу қувурларни ишлатиш ишчи ҳарорати 60⁰С гача.

Термореактив полимерлар асосидаги композицион материаллардан тайёрланган полимерқоришма ва полимербетон қувурлар кимё саноати, коллектор-дренаж тизимида, шахталарда ва бошқа иншоотларда ишлатилади. Уларнинг ички диаметри 100 мм дан 1000 мм гача, узунлиги 80 см дан 6 м гача бўлиши мумкин. Полимербетон қувурлар боғловчининг турига қараб кислотали, ишқорли, тузли ва бошқа агрессив муҳитларга чидамли бўлади. Улар керамик ва металл қувурларга нисбатан самарали ва агрессив муҳитларга бардошли.

Шишапластик қувурлар полиэфир полимери, шиша матоси, шиша иплари ва ш.к. лар асосида махсус центрифугада тайёрланади. Улар мустаҳкам, 150⁰С ишчи ҳароратга бардошли бўлади. Шишапластик қувурлар асосан кимё ва нефтни қайта ишлаш саноатида ишлатилади.