6-боб липидлaр aлмaшинуви

Фосфолипидлар алмашинуви ва функциялари
Фосфолипидлар алмашинуви организмдаги кўп жараёнлар билан боғлиқ: ҳужайра мембраналарининг ҳосил бўлиши ва парчаланиши, ЛП, ўт мицеллари шаклланиши, нафас чиқарганда альвеолалар ёпишишини олдини олувчи ўпка альвеолаларида юза қаватнинг ҳосил бўлиши. Фосфолипид алмашинувининг бузилиши кўп касалликларнинг сабабидир, хусусан, чақалоқларнинг респиратор дистресс-синдроми, жигар гепатози, гликолипидлар тўпланиши билан боғлиқ ирсий касалликлар, лизосома касалликлари. Лизосома касалликларида лизосома жойлашган ва гликолипидлар парчаланишида қатнашадиган гидролазалар фаоллиги пасаяди.
глицерофосфолипидлар алмашинуви
Фосфатидилхолин, фосфатидилэтаноламин ва фосфатидилсерин синтези
Глицерофосфолипидлар ва ёғлар синтези бошланғич босқичлари фосфатид кислота ҳосил бўлгунча бир ҳил боради. Фосфатид кислота икки ҳил йўл билан синтезланиши мумкин: глицеральдегид-3-фосфат ва дигидроксиацетонфосфат орқали (12-расм).

12-расм. Фосфолипидлар биосинтези.
SAM – S-аденозилметионин

Кейинги босқичда фосфатидаза фосфатид кислотадан фосфат қолдиғини ажратади, бунинг натижасида диацилглицерол ҳосил бўлади. Диацилглицеролнинг кейинги ўзгаришлари турли йўллар билан бориши мумкин. Уларда бири — фосфолипид “поляр бошчаси” фаол шаклининг ҳосил бўлиши: холин, серин ёки этаноламин ЦДФ-холин, ЦДФ-серин ёки ЦДФ-этаноламинга айланади (13-расм). Сўнгра диацилглицерол ЦДФ-ҳосилалар билан реакцияга киришади, бунда ЦМФ ажралиб чиқади ва тегишли фосфолипид, масалан фосфатидилхолин ҳосил бўлади.

13-расм. Цитидилдифосфохолин синтези

Глицерофосфолипидлар ўртасида турли ўзгаришлар бўлиши мумкин. Фосфатидилхолин бошқа йўл билан ҳам ҳосил бўлиши мумкин, масалан фосфатидилэтаноламиннинг SAMдан 3 метил гуруҳини олиш орқали. Фосфатидилсерин фосфатидилэтаноламинга декарбоксилланиш орқали айланиши мумкин. Фосфатидилэтаноламин фосфатидилсеринга этаноламинни серинга алмаштириш орқали айланиши мумкин.