5tashabbus amalda

Bolaga kitob bering.

Bola oqqush, oq kaptar,

Dunyolardan bexabar,

Yovuzlik topmay xabar,

Bolaga kitob bering!

Qing`ir yo`lga kirmasdan

Peshonaga urmasdan,

Kimdir pichoq bermasdan,

Bolaga kitob bering!

Internet degan ajdar,

Simidan oqar zahar,

”Dod” demay ro`zi mahshar,

Bolaga kitob bering!

”Kel!”- deya imlar tuzoq,

Qabr qazir, qazir choh,

Ming-ming astag`firulloh,

Bolaga kitob bering!

Ko`zi ochiq ko`rmasdan,

Shayton yo`ldan urmasdan,

Otadan yuz burmasdan,

Bolaga kitob bering!

”Lison ut -tayr” larim,

Yurakka sayrlarim,

Avliyozod nurlarim,

Bolaga kitob bering!

Ko`zlarni ochish kerak,

G`aflatdan qochish kerak,

Qanot chiqarish kerak

Bolaga kitob bering!

Ko`krak kerib yurganlar,

Ko`rkam saroy qurganlar,

”Ne beray?” deb turganlar

Bolaga kitob bering!

Xazinayi jahon u,

Kichik Abu Rayhon u,

Sizga qarab hayton u

Bolaga kitob bering!

Buxoriy – sarvarim u,

Termiziy -anvarim u

Mahmud Zamaxshariy u

Bolaga kitob bering!

Keskir qilich bo`lsin u

Kitobga o`ch bo`lsin u

Yengilmas kuch bo`lsin u

Bolaga kitob bering!

Navoiyni bilsin u

Yoningizga kelsin u

Baxtli bola bo`lsin u

Bolaga kitob bering!

Har ishning boshi- kitob,

Ko`ngillarga nur, oftob,

Yosh avloddan shu xitob-

Bizlarga kitob bering,

Bolaga kitob bering.
Tayyorladi: Asatoba Barfiya