5-Mavzu: ertaklar va uning turlari

Arazlagan koptok, kitob va qalam

Muazzam Ibrohimova
Bor ekan-da, yo‘q ekan, Sanjar ismli dangasa bola bo‘lgan ekan, uning xonasidagi javonda ertak kitob, futbol maydonini ko‘rmaydigan koptok, “Menda hech rasm chizmaydi“, deb ranjiydigan qalam yashar ekan. Sanjar maktabdan zo‘rg‘a sudralib qaytib kelib, sumkasini bir burchakka otibdi. Yechinib, uxlab qolibdi.

Buni ko‘rib turgan javondagi kitob sumka ichidagi darsliklarning ahvoliga achinib: – Bechoralarning qovurg‘alari sinib ketgandir, – debdi.

Qalam va koptokning ham sabri tugabdi. Ular birgalikda Sanjardan yaxshiroq bolani topmoqchi bo‘lishibdi. Qalam barcha rangli do‘stlarini to‘plab, Boburning oldiga ketib qolibdi. Ertak kitob javondan tushib, barcha kitoblarni yoniga chaqiribdi. Sumka ichidagi darsliklarni ham olibdi. Ular Malikaning uyiga ketishibdi. Uning qo‘lidan kitob tushmas ekan. Koptok Sanjarning partadoshi Behruzning oldiga boribdi. U uy vazifalarini qilgach, futbol maydonidan chiqmas ekan.

Yozgi ta’til boshlanibdi. Sanjar ham boshqa bolalar qatori oromgohga boribdi. Oromgohda ba’zi bolalar kitob, boshqalari rasm chizar, o‘g‘il bolalar esa futbol o‘ynashar ekan. Sanjar juda zerikibdi, ertak o‘qimoqchi bo‘lib qarasa, kitobi Malikada, rasm chizmoqchi bo‘lsa, qalamlari Boburda ekan. Bolalarga qo‘shilib futbol o‘ynamoqchi bo‘lsa, Sanjarni ko‘rgan koptok maydondan chiqib ketibdi. Bu Behruzning oldiga ketib qolgan o‘zining koptogi ekan. Sanjar qilgan ishidan juda pushaymon bo‘libdi.

– Endi dangasalik qilmayman! — deb hammaning oldida va’da beribdi. Koptogi, qalamlari va kitoblaridan astoydil kechirim so‘rabdi.