5-bap. Auditorliq tekshiriwdi rejeleshtiriw

5.3. Audittiń reje hám baǵdarlamasın dúziw
Audittiń uluwma rejesi: klient iskerligi menen tanısıw, dáslepki rejelestiriw, tekseriletuǵın xojalıq júritiwshi subyekttiń ishki qadaǵalaw sistemasın bahalaw, tańlaw kólemi hám áhmiyetlilik dárejesin anıqlaw, audit dástúrin tayarlaw, auditti tuwrıdan-tuwrı ótkeriw procesi (dástúrdi orınlaw), orınlanǵan jumıslardıń nátiyjelerin analizlew, barlıq aralıq hám uluwma hújjetlerdi tayarlaw, tekseriw nátiyjelerin klientke usınıw hám t.b.lardı óz ishine alǵan halda audit ótkeriwdiń barlıq basqıshların sáwlelendiriwi kerek (7.1-keste).

Standartta kórsetiliwinshe, auditor uluwma rejede audit ótkeriw múddetleri hám audit ótkeriw grafigin dúziwdi, auditorlıq esabatı (xojalıq júritiwshi subyekt administraciyasına jazba maǵlıwmat) hám auditorlıq juwmaǵın dúziwdi názerde tutıwı kerek. Rejelestiriw waqtında auditor tómendegilerdi esapqa alıwı zárúr:

• 
  kelesi dáwirdegi waqıt qárejetiniń esap-kitabı (qayta audit ótkeriw jaǵdaylarında) hám haqıyqıy miynet qárejetleri;
  
• 
  áhmiyetlilik dárejesi;
  
• 
  auditorlıq toparın dúziw, audit ótkeriwge qamtılatuǵın auditorlar sanı hám tájiriybesi;
  
• 
  auditorlardı, olardıń qániygeli dárejeleri hám lawazımlarına muwapıq audit ótkeriletuǵın belgili bir uchastkalarǵa bólistiriw;
  
• 
  auditorlıq toparınıń barlıq aǵzalarına instrukciya beriw, olardı klienttiń finans-xojalıq iskerligi menen tanıstırıw;
  
• 
  auditorlıq toparı basshısınıń reje orınlanıwı hám járdemshi auditorlar jumısları sıpatı ústinen qadaǵalaw ornatıwı;
  
• 
  auditorlıq ámellerin orınlaw menen baylanıslı metodikalıq máselelerdi túsindiriw.
  

5.1-keste