3-Mavzu. Kinetoplastidalar sinfi: tuzilishi, rivojlanishi, klassifikatsiyasi va pathogen vakillari. Xlorofitlar (Chlorophyta) tipi, Vоlvоkssimonlar (Volvocida) sinfi. Koloniya bo‘lib yashovchi xivchinlilar

1. Teng kipriklilar (Holotricha) kenja sinfi eng sodda tuzilgan, lekin keng tarqalgan va xilma-xil turlarni o‘z ichiga oladi. Tanasi ko‘p sonli, ko‘pincha bir xil tuzilgan, ya'ni juda ham ixtisoslashgan kipriklar bilan qoplangan.
Ayrim turlari tanasining bir qismida kipriklari bo‘lmaydi yoki ular to‘p bo‘lib joylashgan. Ayrim vakillarining og‘iz teshigi reduksiyaga uchragan. Ko‘pchilik teng kipriklilarning yaxshi rivojlangan og‘iz teshigi bor. Og‘iz teshigi terminal (tanasi uchki qismida) joylashgan (Holophrya, Didinium avlodlari) yoki tanasining yon tomoniga siljigan (Nassula, Paramaecium). Teng kipriklilarning aksariyat ko‘pchilik turlari erkin yashaydi. Bakteriyalar, mayda suv o‘tlari hamda boshqa organik zarralar bilan oziqlanadi. Didinium avlodi turlari yirtqich hayot kechiradi. Bu kenja sinfga kavsh qaytaruvchi hayvonlar oshqozonida simbioz yashaydigan (Endodiniomorfa), shuningdek hayvonlar va odamlar organizmida parazitlik qiluvchi (Ixtioftirius, Balantidiy) turlari ham kiradi. Ko‘pchilikka yaxshi ma'lum bo‘lgan tufelka infuzoriyasi ham teng kipriklilar kenja sinfi va gimenostomatalar (Hymenostomata) turkumiga kiradi.
2. Spiral kipriklilar (Spirotricha) kenja sinfi vakillarida kipriklar og‘iz atrofida soat mili aylanadigan tomonga spiralga o‘xshash buralib joylashgan. Bu kipriklar og‘iz oldida bir necha qator membranellalarni hosil qiladi.
Spiral kipriklilar tuzilishi va hayot kechirishi bilan xilma-xil bo‘lgan bir hujayralilardan iborat. Bu kenja sinfning ko‘pchilik turlari eng yirik infuzoriyalar hisoblanadi.
Spiral kipriklilar kenja sinfi har xil kipriklilar (Heterotricha), qorin kipriklilar (Hypotricha) va kam kipriklilar (Oligotricha) turkumlariga bo‘linadi.
Har xil kipriklilar (Heterotricha) turkumi turlarida og‘iz atrofidan tashqari butun tana yuzasi bir xil mayda kipriklar bilan qoplangan. Har xil kipriklilar eng yirik infuzoriyalardir. Ularning katta yadrosi zanjirsimon (trubach-Stentor avlodi), spiralsimon (Spirostomium) bo‘ladi. Boshqa bir vakili bursariya (Bursaria) ning juda keng qopga o‘xshash og‘izoldi chuqurchasi bo‘ladi. Ayrim vakillari baqalarda parazitlik qiladi.