2 соат Талабалар сони

3. БУХГАЛТЕРИЯ ҲИСОБИНИНГ ОБЪЕКТЛАРИ

«Бухгалтерия ҳисоби» фани предметини ташкил қилувчи таълимотлар ичида бухгалтерия ҳисобининг объектларига оид таълимот муҳим ўрин тутади.

Республикамизнинг бухгалтерия ҳисоби тўғрисида қонуни (7-модда)га мувофиқ бухгалтерия ҳисобининг объектлари бўлиб корхоналарнинг активлари, мажбуриятлари, хусусий капитали, захиралари, даромадлари, харажатлари, фойдаси, зарарлари, шунингдек уларнинг ҳаракати билан боғлиқ хўжалик операциялари ҳисобланади. Бухгалтерия ҳисоби предметини ташкил қилувчи ушбу объектлар меъёрий-ҳуқуқий ҳужжатлар ва махсус адабиётларда турлича таснифланади ва тавсифланади. Аксарият манбаларда бухгалтерия ҳисоби предметини ташкил қилувчи объектлар қуйидаги 2.10-расмда келтирилган тўртта гуруҳга ажратилади.

Бухгалтерия ҳисоби предметини ташкил қилувчи объектлар

Хўжалик фаолияти

Хўжалик фаолияти натижалари

Хўжалик маблағлари

Хўжалик маблағлари манбалари

2.10-расм. Бухгалтерия ҳисоби предметини ташкил қилувчи объектлар

«Бухгалтерия ҳисоби» фани бухгалтерия ҳисоби предметини ташкил қилувчи юқорида санаб берилган объектлар моҳияти, уларнинг таснифий, тавсифи ва бошқа жиҳатлари тўғрисида умумий тушунчаларни ўргатади. Иқтисодиётнинг алоҳида олинган тармоқ ва соҳаларида бухгалтерия ҳисобининг предметини ташкил қилувчи объектларнинг хусусиятлари мос равишдаги тармоқ ва соҳаларда бухгалтерия ҳисоби фанида очиб берилади.

ХЎЖАЛИК ФАОЛИЯТИ


Хўжалик фаолияти деганда, умуман олганда, корхона ва ташкилотлар томонидан фойда олиш мақсадида олиб борилаётган ҳамда мазмунан алоҳида номлардаги фаолият турларини ташкил қилувчи хўжалик жараёнлари ва операциялари (муомалалари) мажмуаси тушунилади.