1980-yillar tarjimashunoshlik deb atalgan va tez qanot yoyib borayotgan fan uchun kuchayish davri bo‘ldi

6.2. Axloqqa oid asarlar tarjimalari

“Axloqi Muhsiniy” mavlono Husayn bin Ali Voiz al Koshifiy-ning (910/1505-yilda vafot etgan) asari bo‘lib, u temuriylardan Sulton Husayn Mirzoning o‘g‘li shahzoda Muhsinga bag‘ishlagan. (Kitob­ning nomi ham shundan olingan). Bu kitob o‘zbek tiliga bir necha marta tarjima qilingan. Birinchi marta Xivada mashhur shoir Muham­mad Rizo Ogahiy tomonidan forschadan 1275/1858-yil­da o‘zbek tili­ga ag‘darildi (inv. № 1597/1); qo‘lyozmaning hajmi 432 bet bo‘lib, mul­la Bobojon Xudoyberdi o‘g‘li Sanoiy tomonidan ko‘chirilgan.

“Haft kishvar” (Yetti mamlakat) nomli asarni kotib Sanoiy laqabli mulla Bobojon Xudoyberdi o‘g‘li 1278/1861-1862-yilda ag‘darib, qo‘lyozmani o‘zi ko‘chirgan. “Haft kishvar”ning muallifi Faxri bin Amiri Heraviy bo‘lib, uning o‘zi Navoiyning “Majolisun-nafois” asarini fors tiliga tarjima qilgan, “Haft kishvar” axloqqa oid she’riy asardir. “Nasihatul-mulk” (Podshohlarga nasihat) Abu Homid Muhammad bin Muhammad ul-G‘azzoliy to­monidan fors tilida yozilgan. U 505/1111-yilda vafot qilgan. Bu asar fors tilidan arab tili­ga tarjima qilingan. Muallif asarni saljuqiylardan 1105–1118-yillarda hukm surgan Malikshohga bag‘ishlagan.