15-тема. Халықты социаллық ҚОРҒАЎ системасы

Санатория-курортларда емленгенде берилетуғын напақа. Өзбекстан Республикасы Мийнет ҳәм халықты социаллық қорғаў Министрлигиниң 2015 жыл 6 июлдағы 1489-санлы «Нәгиранлар ҳәм пенсионерлерди санатория-курорт жолламалары менен бийпул тәмийинлеў тәртиби ҳаққындағы көрсетпеге» муўапық санатория-курортларда емленгенде, егер хызметкердиң дем алыс күнлери оның емлениўи ушын жетерли болмаса, ол ҳалда оған санатория-курортта емленген барлық күнлери ушын, жумысшыниң мийнет дем алыс күнлери шығарып тасланған ҳалда напақа есапланады. Жумысшы мийнет дем алысынан санатория-курортқа барыўдан алдын пайдаланған болса да напақа мийнет дем алысы күнин шығарып таслаған ҳалда есапланады. Бунда шөлкем жумысшыниң санатория-курортта емлениўи ушын дем алыстың жетпеген күнлери ушын жумысшы менен келисип, жумысшыге мийнет ҳақы сақланбаған дем алыс береди. Екинши жәҳән урысы нәгиранларына, интернационал жаўынгерлерге, Чернобыль АЭС апатшылығы ақыбетлерин сапластырыўда қатнасқан шахсларға, сондай-ақ, санаторияға емлениўди даўам етиў ушын емлениў мекемелеринен өткир миокард инфаркти менен кеселленген, операция усылы менен жүректи аорта-аконорар шунтовкасы ҳәм аневаризмлери, асқазанның жара кеселликлери, он еки бармақ ишек кеселлигинен емленген ҳәм өт қалтасы алып тасланғаннан кейин тиккелей жиберилген жумысшылерге, сондай-ақ, туберкулёз кеселлиги менен аўырғанларға напақа санаторияда болған барлық ўақытлар ушын есапланады. 16 жасқа шекем болған нәгиран баланы тәрбиялап атырған ата-аналардан бирине, нәгиран баланың санаторияда емленген барлық дәўири ушын оған жеке тәртипте қараў зәрүрлиги ҳаққындағы медициналық жуўмақ бар болғанда напақа бериледи.
Кеселленген шаңарақ ағзасына қараў зәрүр болғанда берилетуғын напақа. Үш жасқа шекем болған баланы ямаса 16 жасқа шекем болған нәгиран баланы бағыўда бәнт болған ана кесел болып, баланы бағыўға қурбы жетпей қалған жағдайларда, бағыў менен бәнт болған ислеп атырған басқа шаңарақ ағзалары ямаса ағайинлерине мийнетке жарамсызлық бетине тийкарынан напақа бериледи. Шаңарақтың кесел болған ағзасына қараў бойынша ўақтынша мийнетке жарамсызлық бети кесел биреўдиң бағыўына мүтәж болған, бирақ 7 календарь күнинен аспаған дәўир ушын бериледи. 14 жасқа жетпеген кесел балаға қараў ушын ўақтынша мийнетке жарамсызлық бети балаға бағыў керек болған, бирақ 14 календарь күнинен аспаған дәўир ушын бериледи.