|
Тўғри тўртбурчак ўзгарувчанлик рамзи ҳисобланади. Бу - шахснинг вақтинчалик шакли, чунки маълум бир даврдагина бу шаклни танлаш мумкин. Эҳтимол, бундай инсон ҳозирги пайтда эришган ютуқларидан қониқмаганлиги боис ўзи учун маъқул бўлган ҳолатни қидирмоқдадир.
“Тўғри тўртбурчак”нинг асосий психологик ҳолати муаммоларга ўралашиб қолиш, айни вақтда муносабатлардаги ноаниқлик ҳисобланади. Уларнинг характерли хусусиятлари тартибсиз ҳаракат, фаолиятидаги ноаниқликда ўз аксини топади. “Тўғри тўртбурчак”лар бир кун давомида таниб бўлмас даражада ўзгаришлари мумкин. Улар ўзларини жуда паст баҳолайдилар, хатти-ҳаракатларидаги наониқликлар ва ўзгаришлар бошқаларни сергаклантиради. Бундай инсонлар билан мулоқот қилишдан кўпчилик қочади. “Тўғри тўртбурчак”лар учун бошқа инсонлар билан мулоқот муҳим ўрин тутади, бу ўтиш даврининг муҳим хусусиятларидан бири ҳисобланади. “Тўғри тўртбурчак”ларнинг ижобий томонлари жасоратлилик, қизиқувчанлик, содир бўлаётган воқеаларга қизиқишдир. “Тўғри тўртбурчак” ҳеч ким қилмаган ишни қилади, ҳеч ким бермаган саволларни биринчи бўлиб беради. Янги материалларни тезда ўзлаштириб олади. Улар ишонувчан ва содда бўлганликлари сабабли атрофдагилар уларнинг устидан ҳукмронлик қилишлари мумкин. “Тўғри тўртбурчак” шахснинг муайян ривожланиш босқичи бўлиб, маълум вақтдан сўнг бу ҳолат ўтиб кетади.
Айлана шакли гармония рамзидир. Бу шаклни танлаганлар, биринчи навбатда ўзаро муносабатларга алоҳида эътибор берадилар. “Айлана” учун қадриятга айланган нарса бу инсонлар ва уларнинг яхши муносабатидир. Айлана бешта шаклнинг ичида зиддиятларни ёқтирмайдиган шаклдир. У кўпинча шахслараро муносабатни тиклашда воситачи сифатида иштирок этади. Бешта шаклнинг ичида “айлана” мулоқотни яхши кўрадиганлар сирасига киради. Унинг учун шахсларнинг ўзаро муносабати муҳим ўрин тутади ва улар яхши эшитувчи ҳамдирлар. Улар бошқа инсонлар дардини тушуна оладилар ва уларга ҳамдард бўла оладилар. “Айлана”лар бировнинг қувончи ва аламини худди ўзиники сингари идрок эта олади. Шунинг учун ҳам бошқа шакллар “айлана”га талпинадилар. “Айлана”лар инсонларни қандайлигини билиб олиш қобилиятига эгалар. Улар жамоага ўзларини бахшида қиладилар. “Айлана”лардан бизнес соҳасида на бошқарувчи ва на менежер чиқади. Чунки улар инсоннинг кўнглини оғритишни ёмон кўрадилар. “Айлана”лар одамларга йўналган инсонлар ҳисобланади. Улар тинчлик тарафдорларидир, шунинг учун ҳам ўз мавқеларига эга бўлишлари қийинроқ кечади. “Айлана”лар учун энг оғири бу можароларга киришишдир, бунга аралашмаслик учун улар қўлларидан келган барча ҳаракатларни амалга оширадилар. “Айлана”лар қатъий эмаслар, сиёсий ўйинларда ўзларининг жамоаларини яхши кўрсата олмайдилар. Улар кимнинг қўлида ҳокимият бўлишига қизиқмайдилар. Улар доимо тинчлик тарафдоридирлар. Агар муаммо ахлоқ ва ҳақиқат масаласига бориб тақалса, “айлана”лар қатъий бир йўналишга эга бўладилар. “Айлана” бурчаги бўлмаган шакл бўлганлиги сабабли унда ўнг яримшар устунлик қилади. Ўнг яримшарга хос бўлган хусусиятларнинг аксарияти образлилик, интуитивлик, эмоционал бойлик “айлана”ларга тегишлидир. “Айлана”ларни туғма психолог деб ҳисобласа ҳам бўлади. Бироқ бизнес оламининг бошида туриши учун “айлана”га ташкилотчилик ва бошқарувчилик қобилияти етишмайди.
Зигзаг ижодкорлик рамзи ҳисобланади. Бу бешта шаклнинг ичида энг қизиқарли шаклдир - айнан “зигзаг” шакли ягона тугалланмаган фигура ҳисобланади. Зигзагни асосий шакл сифатида қатъий танлаган инсонларнинг ўнг яримшарлари фаоллиги устиворлик хусусиятига эгадир. Айлана сингари бу шаклга ҳам образлилик, интуитивлик хосдир. Бу шакл эгалари тартиб-интизомга риоя қилмайдилар. Кўпгина “чап яримшарлилар” “зигзаг”ларни тушунишлари қийинроқдир. “Зигзаг”ларда юқори даражада ривожланган эстетик дид мавжуд. Улар бир-бирига боғланмаган деталларни ўзаро боғлашни ёқтирадилар. “Айлана”ларга ўхшаб шахслараро муносабатларни биринчи ўринга қўймайдилар, балки, аксинча, кўпроқ баҳс-мунозараларга киришишни ёқтирадилар, чунки айнан шундай пайтларда уларда янги ғоялар пайдо бўлиши мумкин. “Зигзаг”лар дунёни доимий равишда ўзгариб турадиган борлиқ сифатида идрок қиладилар. Шу боис қонун-қоидаларга бўйсунишни ёқтирмайдилар, жамоат қабул қилган меъёрларни бузишга ҳаракат қиладилар. “Зигзаг”лар аниқ режалаштирилган, стандарт шарт-шароитларда самарали меҳнат қила олмайдилар. Уларни аниқ, ўзгармас ҳолатлар уларнинг асабларига тегиши мумкин. “Зигзаг” бир хилликни ёқтирмайди, ҳаёти ранг-баранг бўлсагина мазмунга эга бўлади. Иш жараёнида доимо мустақил бўлишга интиладилар. Агар “зигзаг” учун шундай шароит яратилса, унинг ишларида унумдорлик бўлади. “Зигзаг”лар битта иш услубига таяниб қолмайдилар, ҳар доим янги услублар ўйлаб топишга интиладилар. “Зигзаг” доимо келажакка интилиб яшайди. Агар унда янги ғоя пайдо бўлса, у хурсандлигидан бу ҳақда бутун дунёга жар солишга тайёр бўлади, ўз ғоясини чарчамасдан тарқатишга интилади. Бироқ бошлаган ишларини кўпинча охиригача етказмай бошқа ишни бошлаб юборадилар.
Психодиагностик методикаларни ўтказиш мобайнида олинган эмпирик тадқиқот материаллари математик-статистик методлар ёрдамида сон ва сифат жиҳатидан таҳлил қилинди.
Do'stlaringiz bilan baham: |
