Шунингдек, йилига 90 млн долларлик маҳсулот экспорт қилиниши режалаштирилган

Барчамизга маълумки, Президент Шавкат Мирзиёев жорий йилнинг 4 декабрь куни Тошкент металлургия заводининг очилиш маросимида иштирок этганлиги юртимиз учун янги даврни очиб берди.
Шунингдек, Тошкент давлат техника университети ҳамда Тошкент металлургия заводи ХК МЧЖ ўртасида 05.02.2018 йилда 28-сонли тузилган Меморандум асосида “Металларга босим билан ишлов бериш” кафедраси талабаларини амалиётга юбориш, битирувчиларни келажакда иш билан таъминлаш, илмий ишларни олиб бориш, тажрибалар ўтказиш ва олинган натижалар асосида хўжалик шартномаларини тузиш ҳамда корхонанинг ишлаб чиқариш жараёни билан бевосита танишиш мақсадида кафедранинг профессор-ўқитувчилари ушбу корхонага ташриф буюришди.
Юртимизда қора металлургия ривожланмагани сабабли саноат корхоналари кўп муаммога учрагани, эндиликда Тошкент металлургия заводида йилига 500 минг тонна рух ва полимер қопламали совуқ ҳолда прокатланган металл листлар ишлаб чиқарилиши юқорида келтирилган муаммони бартараф этади. Бу қурилиш материаллари, маиший техника, электротехника ва озиқ-овқат саноатидаги юзлаб корхоналарнинг эҳтиёжини таъминлаш имконини беради. Илгари бундай маҳсулотлар асосан четдан олиб келинарди.
Мазкур мажмуада биринчи босқичда импорт ўрнини босадиган маҳсулот ишлаб чиқариш ҳисобидан 400 миллион долларга яқин маблағ тежалади. Маҳаллийлаштириш даражаси сезиларли ошади.
Шунингдек, йилига 90 млн долларлик маҳсулот экспорт қилиниши режалаштирилган.
Мажмуада 700 га яқин киши иш билан таъминланади. Лекин турдош тармоқлар билан бирга 5 мингта янги иш ўрни яратилади. Завод қурилиши 2017 йилда бошланган эди. Уни бунёд этишга 420 млн доллар сарфланган.
Бу ерда Италия, Германия, Россия, Австрия, Швейцария, Жанубий Корея каби 27 та мамлакатдан асбоб-ускуналар келтириб ўрнатилган.
Кафедра профессор-ўқитувчилари Тошкент металлургия заводидаги технологик жараён билан танишди.
Ушбу корхона техник ва технологик жиҳатдан халқаро миқёсдаги йирик мажмуалар қаторига киради. Бу ерда Италия, Германия, Россия, Австрия, Швейцария, Жанубий Корея каби 27 та мамлакатдан асбоб-ускуналар келтириб ўрнатилган. Ишлаб чиқариш, назорат қилиш ва бошқариш жараёнлари автоматлаштирилган.
Энг муҳими, заводда “яшил” технологиялар қўлланган. Чиқиндиларни қисқартириб, қатъий экологик меъёрларга амал қиладиган, чиқинди газларни ушлаб қоладиган, оқова сувларни тозалайдиган ва бошқа зарур ускуналар билан жиҳозланган.
Мажмуа мутасаддилари ишлаб чиқарувчилар билан йўлга қўйиладиган кооперация алоқалари ҳақида маълумот берди. Завод маҳсулотларига ҳозирнинг ўзидаёқ ўнлаб корхоналардан буюртмалар тушаётгани айтилди.
Шунингдек кафедра профессор-ўқитувчилари заводнинг шоурумида ҳам бўлиб, бу ерда ишлаб чиқариладиган маҳсулотлар намуналарини кўздан кечиришди.