1. Umumiy qoidalar Obodonlashtirish, obyektlarini qurish va barpo etishda arxitektura va qurilish normalari va qoidalari

§ 5. Drenaj xo‘jaligi
36. Drenaj ishlarini tashkil etish drenaj xo‘jaligini saqlashni, uni mukammal, joriy ta’mirlashni va undan foydalanish bo‘yicha boshqa ishlarni nazarda tutadi.
37. Drenaj xo‘jaligini mukammal ta’mirlash quyidagilarni o‘z ichiga oladi:
o‘zanni chuqurlashtirgan va to‘g‘rilagan holda mexanizatsiya vositasida tozalash, teshikli quvurlar qismlarini almashtirish, qo‘shimcha kuzatish quduqlari qurish, yopiq kollektorlarni ildizlar va boshqa predmetlardan tozalash va ularni yo‘qotish bo‘yicha g‘ovvoslik ishlarini bajarish;
vertikal suv pasaytirish quduqlarini, vertikal va gorizontal drenaj tarmoqlarini, kollektorlarni ta’mirlash, ishdan chiqqan drenaj liniyalarini va kollektorlarning ayrim tizimlarini tozalash yoki to‘liq qayta joylashtirish;
mukammal ta’mirlash ixtisoslashtirilgan pudrat tashkilotlari tomonidan, loyiha-smeta hujjatlariga va belgilangan tartibda tasdiqlangan aniq manzilli ro‘yxatlarga muvofiq amalga oshiriladi.
38. Drenaj obyektlaridan foydalanish inshootlarning ishlashini doimiy nazorat qilishni, rejali-oldini olish ishlarini bajarishni, joriy ta’mirlashni, liniya inshootlarini tozalash va vaqti-vaqti bilan ko‘zdan kechirishni, sizot suvlar sathini nazorat qilish va zarur darajada saqlashni o‘z ichiga oladi.
§ 6. Sanitariya jihatidan tozalash
39. Obodonlashtirish obyektlarini sanitariya jihatidan tozalash tizimiga tashqarini tozalash — hovli hududlarini, ko‘chalarni va umumiy foydalaniladigan joylarni tozalash kiradi, bular yozgi tozalashga (supurib-sidirish, yuvish, changlarni yo‘qotish) va qishki tozalashga (qorni, muzlagan joylarni yo‘qotish) bo‘linadi.
40. Shaharlar, tuman markazlari, shahar posyolkalari va qishloq aholi punktlarida sanitariya qoidalari, normalari va gigiyena normativlari hamda ekologik talablarga muvofiq, qattiq maishiy chiqindilarni to‘plash, olib chiqib ketish, joylashtirish, saqlash, tashish, utilizatsiya qilish, zararsizlantirish, shuningdek, suyuq maishiy chiqindilarni olib chiqib ketish va tashishni o‘z ichiga olgan tadbirlar majmuini nazarda tutuvchi hududlarni tozalash, chiqindilar bilan bog‘liq ishlarni amalga oshirish sohasida xizmat ko‘rsatishga ixtisoslashgan tashkilotlar tomonidan amalga oshiriladi.