1-мавзу ҳУҚУҚшунос мутахассис шаклланишида замонавий иш кўникмалари ва компетенцияларнинг роли

4. Ўзини ўзи ривожлантиришда тўсиқларни бартараф этиш усуллари.

Вақт – бизга тақдир берган энг буюк неъматлардан бири бўлиб, уни тўхтатиб қолишга қодир эмасмиз. Янги ҳаёт бошлаш учун душанбани кутиш шарт эмас. Ҳаракатни ҳозироқ бошланг. Ортиқча кечиктириш – ўзликни ривожлантириш олдидаги энг биринчи тўсиқдир. Нимадир биз истагандек бўлмаса, дарров айбдорни излай бошлаймиз, бу ҳам тўсиқ.

Ўз-ўзини саботаж қилиш – ўзингизни бошқача намоён қилиш. Узоқ вақт сохта “мен” билан яшаш қийин. Бу умидсизлик ва омадсизликка олиб келади. Шу ҳолга тушмаслик учун эса қуйидаги машқ ва усулларни ишга солинг, чинакам ўзлигингизни топишга урининг.


1. Цитатани муҳокама қилинг: «Қўлимдан келади деб ўйласангиз ҳам, қўлимдан келмайди деб ўйласангиз ҳам – сиз иккала вазиятда ҳам ҳақсиз».
Генри Форд


2. Қуйидаги саволлар ҳақида ўйлаб кўринг:
Менинг йўлимда нима тўғаноқ бўляпти?
Мансаб (билим, тажриба) пиллапояларидан кўтарилмаётганимнинг асосий сабаблари нималар?
Мендан каттароқ, тажрибалироқ ҳамкасбларим (курсдошларим ёки муаллимларим) менга рўйхушлик бермаяптими?
Жавобларда, энг аввало, сизга маъқул келмаётган 5 тадан нарсани ёзинг. Рўйхатингизга қаранг-чи, улар орасида боғлиқлик борми? Ёзган нарсаларингизни диққат билан ўқиб чиқинг. Нима кўрдингиз? Бирор-бир қонуният сездингизми? Кўнгилсизликларнинг бош сабаби нималарда?
Шу саволларга холис, тўғри, мардона жавоб бериб, ўз устингизда ишлаб гуруҳда, жамоада, фирмада, ижтимоий ҳаётда ўзингизнинг позитив имижингизни яратишингиз мумкин.
3. Топшириқ – шахсий ўсиш учун машқ: «Якшанба оқшоми»
Сиздан фақат бир нарса талаб қилинади: ўзингиз, яқинларингиз ва дўстларингизни якшанба – бу сизнинг ўзингизга бағишланган кун эканлигига ўргатишингиз лозим. Шу куни сиз алоҳида хонада бошқалардан холи қолишингиз, сайр қилишингиз, кинога боришингиз ёки хиёбонда сайр қилишингиз мумкин. Хуллас, нима истасангиз шуни қиласиз. Ягона шарт – ҳеч кимнинг олдида ҳеч қандай мажбуриятингиз йўқ. Назарий жиҳатдан, якшанбани турмуш ўртоғингиз ва фарзандларингизга (ёхуд севган инсонингизга) бағишлашингиз мумкин. Лекин, барибир, сиздан ниманидир талаб қила бошлашади. Шунинг учун энг маъқули – холи қолиш ва ўз хоббингиз билан шуғулланиш.
Инсонни ишхона, оила, дўстлар, таниш-билишлар, қариндошлар олдидаги доимий мажбурият омили таъқиб қилади. Шундай залворли «ғиштлар» остида сизнинг қизиқишларингиз, яширин иқтидорингиз куртак ёзаётганлиги эҳтимолдан холи эмас, албатта. Фақат шу ниҳол аҳён-аҳёнда қуёш нуридан бахраманд бўлиб турса, бас. Бир ойдан сўнг сиз илгари якшанба кунидаги бўш вақтингизсиз қандай яшаганингизни тасаввур ҳам қилолмай қоласиз.