1-мавзу: “персонални бошқариш” фанининг моҳияти ва вазифалари

1-МОДУЛ. ПЕРСОНАЛНИ БОШҚАРИШ ТИЗИМИ
1-мавзу: “ПЕРСОНАЛНИ БОШҚАРИШ” ФАНИНИНГ МОҲИЯТИ ВА ВАЗИФАЛАРИ
1.1. Персонални бошқариш — фан сифатида
Бозор иқтисодиёти шароитида корхоналар юқори самара билан фаолият кўрсатиши, муваффақиятли рақобат қила олиши фанда “Персонал“ атамаси билан номланадиган меҳнат жамоасининг таркиби, малакаси, салоҳияти, ижодий изланиши, масъулияти каби жуда кўпғина сифатлари ҳал қилувчи аҳамият касб этиши амалий исботини топган. Бугунги кунга келиб мазкур масалалар билан махсус шуғулланувчи „Персонални бошқариш” фани тобора ривожланиб бормоқда.
Ғарб давлатларида бозор иқтисодиёти шароитларида „Персонални бошқариш” кўпроқ „менежмент» атамаси билан номланади.
Менежмент (инглизча “management”сўзидан) — бозор иқтисодиёти шароитларида иқтисодий бошқарув тамойиллари, функция ва услубларини қўллаган ҳолда моддий ва меҳнат ресурсларидан оқилона фойдаланиш ҳисобига белгиланган'мақсадларга эришиш учун амалга ошириладиган бошқарув фаолиятидир.
Менежмент аслида „бошқарув» сўзининг синоними ҳисобланиб, асосан бозор иқтисодиёти шароитларида фаолият кўрсатаётган корхоналарда ижтимоий-иқтисодий жараёнларни бошқаришни англатади.
Менежмент дейилганда қуйидаги маънолар англанади:
1. Корхонанинг бошқарув ходимлари бошқарув аппарати сифатида.

2. 
   Бошқарув аппарати корхонада бажарадиган функциялар.
   
3. 
   Менежмент корхонани илмий асосда бошқариш сифатида.
   

Менежмент функциялари тизимида персонални бошқариш вазифалари қандай ўринга эгалиги энг муҳим масаладир. Менежмент функцияларидан персонални бошқариш функциялари фаркланади.
Менежментнинг умумий функциялари дейилганда корхона кўламида махсус функциялардан бирини бажарувчи алоҳида бўлинма фаолияти тушунилади. Бошқарув ходимлари менежментининг барча функцияларини, шунингдек, корхоналарни бошқаришнинг махсус функцияларини амалга ошириш учун зарурдир. Худди мана шу менежментнинг махсус функцияси ҳисобланган персонални бошқариш алоҳида ўзига хос хусусиятга эга.