1. маъруза машғулотлари

Дин социомаданий институт сифатида. Ижтимоий ҳаётнинг муҳим жабҳаси бўлган дин ва диний эътиқод масаласи социология фанининг муҳим объектларидан бири ҳисобланади. Социология жамият ҳаётини ўрганар экан, шу ҳаётнинг муҳим таркибий қисми бўлган ва айни пайтда унга кучли таъсир ўтказувчи омил - дин доимо унинг диққат марказида бўлган. Конт жамият тараққиётини даврларга бўлар экан, асосий мезонлардан бири сифатида динга мурожаат қилади. Унинг фикрича, инсоният ўз ривожида уч босқични босиб ўтади. Булар қуйидагилар: теологик, метофизик ва илмий босқичлар. Ҳар уч босқичда ҳам дин муайян рол ўйнайди. Дин қуйидаги ўзига хос белгиларга эга:
1. Муайян эътиқод ва таълимотнинг мавжудлиги. Ҳар бир дин дунёни ўз назарича изоҳлайди ва ишонувчиларда муайян эътиқод шакллантиради;
2. Маросим ва расм-русумлар. Ҳар бир дин ўзига хос маросим ва расм русумларга эга;
3. Диний маросим ва расм-русумларнинг муайян қисми фақат белгиланган жойларда жамоа бўлиб бажарилиши. Масалан, яҳудий ва христиан динида ибодатнинг асосий қисми синагогда ва черковда бажарилади. Ислом динида эркаклар томонидан ўқиладиган намоз асосан жомъе масжидларида ўқилади. Дин сеҳргарликдан аввало мана шу белги билан, яъни муайян маросимларни муайян даврларда бажариш билан фарқланади. Сеҳргар ва шомонлар ғайритабиий ҳаракатларни индивидуал ҳолатда бажарсалар, диндорлар диний маросим ва ибодатларни асосий қисмини жамоа бўлиб бажарадилар. Санаб ўтилган белгиларнинг учтаси ҳам дунёвий динларнинг барчасида мавжуд. Бу динлар қуйидагилар: иудаизм, христианлик, ислом.
Иудаизм улар ичида энг қадимийси бўлиб, милоддан тахминан минг йил олдин шаклланган. Бу дин ўша даврдаги динлардан фарқли ўлароқ, якка худони тан оларди.
Милоднинг дастлабки асрларида яҳудийлар дунёнинг кўп мамлакатларига тарқалиб кетдилар, лекин бирор мамлакатда иудаизм расмий дин сифатида тан олинмади. Кўп мамлакатларда бу дин вакиллари таъқиб остига олинди. Иккинчи жаҳон уруши йилларида нацистлар томонидан кўплаб яҳудийлар қириб юборилди. Уруш тугагач, Исроил давлати ташкил топди ва унда иудаизм расмий дин сифатида эътироф этилди.