1. Fuqarolik qonunchiligi. Tadbirkorlik / Tadbirkorlik faoliyatini davlat tomonidan qo‘llab-quvvatlash]

5-bob. Mahallalarda aniqlangan muammolarni hal etish tartibi
19. Doimiy vakil aniqlangan muammolarni tegishliligi bo‘yicha tuman (shahar) tashkiloti xodimlari, fuqarolar yig‘ini raislari va mahalla faollarini jalb qilish orqali hal etish choralarini ko‘radi.
Mahalla darajasida bartaraf etish imkoni bo‘lmagan masalalar boshqaruv ofisiga taqdim etiladi.
20. Boshqaruv ofisi ikki kun muddatda masalani ijobiy hal etish choralarini ko‘radi.
Boshqaruv ofisi darajasida hal etish imkoni bo‘lmagan masalalar muvofiqlashtiruvchi guruhga taqdim etiladi.
21. Muvofiqlashtiruvchi guruh ikki kun muddatda masalani joyiga chiqqan holda o‘rganib, uni hal etish choralarini ko‘radi.
Tuman (shahar) darajasida hal etish imkoni bo‘lmagan masalalar Qoraqalpog‘iston Respublikasi Vazirlar Kengashi Raisining birinchi o‘rinbosari, viloyatlar va Toshkent shahar hokimlarining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosarlariga taqdim etiladi.
22. Mahallarda aniqlangan muammolar va ularning hal etilganligi to‘g‘risidagi ma’lumotlarning barchasi mahalla fuqarolar yig‘ini raislari tomonidan yuritiladigan “Qayd etish daftari”ga kiritib boriladi.
23. Fuqarolar yig‘ini raislari tomonidan yuritiladigan “Qayd etish daftari”ning namunaviy shakli Respublika komissiyasi tomonidan tasdiqlanadi.
24. Hal etish imkoni bo‘lmaydigan tizimli (qo‘shimcha mablag‘, vaqt va o‘rganishlar talab qiladigan) muammolar bo‘yicha ularni hal etish darajasiga qarab muvofiqlashtiruvchi guruh tuman (shahar), hududiy, respublika “yo‘l xaritalari”ni ishlab chiqadi hamda Qoraqalpog‘iston Respublikasi Vazirlar Kengashi, viloyatlar, tumanlar (shahar)lar hokimliklariga tasdiqlashga kiritadi.
Bunda respublika darajasida ko‘rib chiqiladigan muammolar bo‘yicha ishlab chiqilgan “yo‘l xaritalari” Respublika komissiyasiga kiritiladi.
25. Respublika komissiyasi, Qoraqalpog‘iston Respublikasi Vazirlar Kengashi, viloyatlar, tumanlar (shahar)lar hokimliklari:
uch kun muddatda “yo‘l xaritalari”ga kiritilgan masalalar bajarilishiga to‘sqinlik qilayotgan muammolar va omillarni tegishliligi bo‘yicha respublika va hududiy davlat boshqaruvi organlari hamda tijorat banklari rahbarlari bilan birgalikda ko‘rib chiqishni tashkil etadi;
bir hafta muddatda hal etish imkoni bo‘lmaydigan tizimli (qo‘shimcha mablag‘, vaqt va o‘rganishlar talab qiladigan) muammolar bo‘yicha aniq ijrochilar, muddatlar va bajarish mexanizmi ko‘rsatilgan holda “yo‘l xaritalari”ni tasdiqlaydi va ijro uchun taqdim etadi.
26. Respublika va hududiy davlat boshqaruvi organlari hamda tijorat banklari rahbarlari “yo‘l xaritalari”da ko‘rsatilgan muammolar bajarilishi va ijrosi holati to‘g‘risidagi ma’lumotlarni har ikki haftada tegishliligi bo‘yicha Respublika komissiyasiga hamda Qoraqalpog‘iston Respublikasi Vazirlar Kengashi, viloyatlar, tumanlar (shahar)lar hokimliklariga kiritib boradi.
27. Muvofiqlashtiruvchi guruh har ikki haftada “yo‘l xaritasi”ga kiritilgan muammolar bo‘yicha amalga oshirilayotgan ishlar to‘g‘risidagi ma’lumotlarni Qoraqalpog‘iston Respublikasi Vazirlar Kengashi, viloyatlar, tumanlar (shahar)lar hokimliklariga taqdim etib boradi hamda hal etilgan muammolar bo‘yicha ma’lumotlar ikki kun muddatda “Qayd etish daftari”ga kiritilishini ta’minlaydi.