1. Аудиторлик текширувининг стратегиясини белгилаш. Аудитни режалаштириш. Режалаштиришдан олдинги тайёргарлик

Аудиторлик текширувининг стратегияси.


1. Аудиторлик текширувининг стратегиясини белгилаш. Аудитни режалаштириш.
2. Режалаштиришдан олдинги тайёргарлик.
3. Корхона тўғрисида умумий маълумот олиш.
4. Аудитда моддийлик (муҳимлилик)ни аниқлаш.
5. Аудиторлик таваккалчилигини баҳолаш.
6. Ички назорат тизимини баҳолаш.
7. Электрон ишлови тизимидаги маълумотларнинг аудити.
8. Эксперт хизматидан фойдаланиш.


1. Аудиторлик текширувининг стратегиясини белгилаш. Аудитни режалаштириш.
Одатда аудиторлик текшируви ҳар доим маълум бир муддат билан чекланади (ўртача – 2 ҳафта); ушбу чекланишлар оқибатида қуввати бўйича йирик ва ҳатто ўрта бўлган корхонанинг молиявий-хўжалик фаолиятини ҳар доим ҳам ёппасига текширишни амалга ошириш имкони бўлмайди. Шунинг учун, ҳар бир иқтисодий субъектнинг ўзига хос бўлган хусусиятларини ҳисобга олган ҳолда текширув стратегиясини танлаш муҳим аҳамиятга эгадир. Бу қуйидагиларни назарда тутади:

• 
  мижоз фаолияти тўғрисида тўпланган маълумотни кўриб
  чиқиш;
  
• 
  таваккалчилик ва ички назорат самарадорлигини олдиндан
  баҳолаш;
  
• 
  операцияларни алоҳида гуруҳлар бўйича текширувнинг
  батафсиллилиги, моҳияти ва давомийлилигини аниқлаш.
  

Аудиторлик текширувининг стратегияси энг оқилона йўлларни танлаш асосида ушбу текширувнинг мақсадларига эришишдан иборатдир ва аудиторнинг тажриба ва малакасига, аудиторлик фирма ва мижознинг узоқ, муддатли ҳамкорлигига, яъни: мижознинг хусусиятларини қай даражада билиши, аудит жараёнида ечиладиган масалалар тавсифи ва бошқа омиллар билан боғлиқдир.
Аудиторлик текширувининг стратегияси аудитор томонидан ёзма равишда тузилган режа шаклида бўлиши лозим ва унинг мақсади қуйидагилардан иборат:
1) тестларнинг ҳажми, тури ва кераклилигини олдиндан белгилаб олиш;