020 йил апрель ҳолатига, Ўзбекистон Республикаси Ҳукумати номидан ва давлат кафолати остида жалб қилинган қарз қолдиғи дастлабки ҳисоб-китобларга кўра 18,2 млрд. АҚШ доллари

2020 йил 1 апрель ҳолатига, Ўзбекистон Республикаси Ҳукумати номидан ва давлат кафолати остида жалб қилинган қарз қолдиғи дастлабки ҳисоб-китобларга кўра 18,2 млрд. АҚШ доллари эквивалентини ёки ялпи ички маҳсулотга (ЯИМ) нисбатан 31,3 фоизни ташкил этди.
Хусусан, I чоракда давлат ташқи қарзи 0,5 млрд. АҚШ долларига ёки йил бошига нисбатан 2,9 фоизга ошиб, жорий йилнинг 1 апрель ҳолатига 16,11 млрд. АҚШ долларига ёки ЯИМга нисбатан 27,7 фоизга етди.
Шундан:
- Ҳукумат номидан жалб қилинган ташқи қарз - 10,9 млрд. АҚШ доллари;
- Ҳукумат кафолатлаган ташқи қарз – 5,2 млрд. АҚШ доллари.


Давлат ички қарзи 20,01 трлн. сўмни (2,1 млрд. АҚШ доллари) ёки ЯИМга нисбатан 3,6 фоизни ташкил этди.
Шундан:
- Ҳукумат номидан жалб қилинган ички қарз – 1,7 трлн. сўм (0,2 млрд. АҚШ доллари);
- Ҳукумат кафолатлаган ички қарз – 18,3 трлн. сўм (1,9 млрд. АҚШ доллари).

Давлат қарзининг сўнги йиллардаги ўсиши динамикасига қарамай, халқаро меъёрларга кўра Ўзбекистон Республикаси Давлат қарзи (ЯИМга нисбатан 31,3 фоиз), шу жумладан давлат ташқи қарзи (ЯИМга нисбатан 27,7 фоиз) мўътадил даражада сақланиб қолмоқда.
Жаҳон банки ва Халқаро валюта жамғармасининг Қарз барқарорлиги таҳлилига кўра, ўзининг иқтисодий салоҳияти бўйича Ўзбекистон Республикасининг давлат қарзига хизмат кўрсатиш салоҳияти кучли ҳисобланади ва ушбу мамлакатларда давлат ташқи қарзи учун меъёр Ялпи ички маҳсулотнинг 50% гача ташкил этиши мумкин.
Халқаро валюта жамғармаси томонидан 2020 йил 19 май куни чоп этилган Қарз барқарорлиги ҳисоботида республиканинг қарзга хизмат кўрсатиш салоҳияти юқори, давлат ташқи қарзи эса мўътадил даражадалиги қайд этилган. Шунингдек, мамлакатимизнинг қарзни тўлай олиш салоҳиятининг умумий индикатив кўрсаткичи (СI) 3,1 бирликдан 3,2 бирликка кўтарилди.
Маълумот учун: Қарзни тўлай олиш салоҳиятининг умумий индикатив кўрсаткичи (СI) Жаҳон банкининг мамлакат сиёсий ва институционал салоҳияти баҳоси (CPIA), мамлакатнинг 5 йиллик факт ва 5 йиллик прогноз макроиқтисодий кўрсаткичлари, жумладан, жаҳон ўсиш суръати, реал ўсиш суръати, пул ўтказмалари ва олтин-валюта захираларини ҳисобга олган ҳолда топилади. Мазкур кўрсаткич орқали мамлакатнинг қарзни тўлай олиш салоҳияти даражаси аниқланади (3,05 бирликдан юқори бўлса, кучли). Ўзбекистон Республикаси 3,2 бирлик индикатив кўрсаткичи (СI) билан қарзни тўлай олиш салоҳияти кучли мамлакатлар сирасига киради.