Ўзбекистон ёшлар иттифоқи сирдарё вилояти кенгаши сирдарё вилояти жисмоний тарбия ва спорт бошқармаси сирдарё вилояти ҳАЛҚ таълими бошқармаси

СИРДАРЁ ВИЛОЯТИ ФАВҚУЛОДДА ВАЗИЯТЛАР БОШҚАРМАСИ
ЎЗБЕКИСТОН ЁШЛАР ИТТИФОҚИ СИРДАРЁ ВИЛОЯТИ КЕНГАШИ
СИРДАРЁ ВИЛОЯТИ ЖИСМОНИЙ ТАРБИЯ ВА СПОРТ БОШҚАРМАСИ
СИРДАРЁ ВИЛОЯТИ ҲАЛҚ ТАЪЛИМИ БОШҚАРМАСИ
СИРДАРЁ ВИЛОЯТИ КАСБИЙ ТАЪЛИМНИ РИВОЖЛАНТИРИШ ВА МУВОФИҚЛАШТИРИШ ҲУДУДИЙ БОШҚАРМАСИ
СИРДАРЁ ВИЛОЯТИ МАДАНИЯТ БОШҚАРМАСИ
СИРДАРЁ ВИЛОЯТИ СОҒЛИҚНИ САҚЛАШ БОШҚАРМАСИНИНГ
ҚАРОРИ


Сирдарё вилояти умумтаълим ҳамда ўрта махсус профессионал таълим муассасаларида “Ёш қутқарувчи” кўнгиллилар клубларини тузиш ҳамда ўқувчилар ўртасида “Ёш қутқарувчи” мусобақаларини ташкил этиш ва ўтказиш тартиби тўғрисидаги низомни тасдиқлаш ҳақида

Ўзбекистон Республикасининг “Ёшларга оид давлат сиёсати тўғрисида”ги, “Фуқаро муҳофазаси тўғрисида”ги, “Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида”ги, “Қутқарув хизмати ва қутқарувчи мақоми тўғрисида”ги ҳамда “Ёнғин хавфсизлиги тўғрисида”ги қонунларида белгиланган вазифалар ижросини таъминлаш мақсадида, умумтаълим ҳамда ўрта махсус профессионал таълим муассасалари ўқувчилари ўртасида соғлом турмуш тарзини татбиқ этиш, уларни қутқарувчи касбига қизиқтириш, ҳарбий ватанпарварлик руҳида тарбиялаш, фавқулодда вазият юз берганда тўғри ҳаракат қилиш, ўзи ҳамда ўзгаларга ёрдам бериш, уларда фуқаро муҳофазаси ва ёнғин хавфсизлигига оид билим, малака ва кўникмаларни шакллантириш ҳамда ушбу йўналишда тарғибот-ташвиқот ишларини кенг кўламда олиб боришни таъминлаш шунингдек, Ўзбекистон Республикаси Фавқулодда вазиятлар вазирлиги, Ўзбекистон ёшлар иттифоқи Марказий Кенгаши, Жисмоний тарбия ва спорт вазирлиги, Халқ таълими вазирлиги, Олий ва ўрта махсус таълим вазирлиги, Маданият вазирлиги ҳамда Соғлиқни сақлаш вазирлигининг 2021 йил 27 январь кунидаги 5/54/7/8/16/5/62 – сонли қарори ижросини таъминлаш мақсадида Сирдарё вилояти Фавқулодда вазиятлар бошқармаси, Ўзбекистон ёшлар иттифоқи Сирдарё вилояти кенгаши Сирдарё вилояти жисмоний тарбия ва спорт бошқармаси Сирдарё вилояти ҳалқ таълими бошқармаси, Сирдарё вилояти касбий таълимни ривожлантириш ва мувофиқлаштириш ҳудудий бошқармаси, Сирдарё вилояти маданият бошқармаси, Сирдарё вилояти соғлиқни сақлаш бошқармаси қарор қилади:

1. 2021 йилдан бошлаб ҳар йили умумтаълим ҳамда ўрта махсус профессионал таълим муассасаларида “Ёш қутқарувчи” кўнгиллилар клубларини тузиш ҳамда ҳар бир таълим тизимида мазкур клублар ўртасида “Ёш қутқарувчи” мусобақаларини ўтказиш йўлга қўйилсин.
2. Қуйидагилар:
“Ёш қутқарувчи” кўнгиллилар клубини тузиш ва фаолиятини ташкил этиш тартиби тўғрисидаги Низом 1-иловага;
“Ёш қутқарувчи” мусобақасини ўтказиш тартиби тўғрисидаги Низом 2-иловага;
“Ёш қутқарувчи” кўнгиллилар клубини тузиш ва “Ёш қутқарувчи” мусобақасини ўтказиш бўйича республика ташкилий қўмита таркиби 3-иловага;
“Ёш қутқарувчи” кўнгиллилар клубини тузиш ва “Ёш қутқарувчи” мусобақасини ўтказиш бўйича масъул бошқармалар ва ташкилотлар ўртасидаги вазифалар 4-иловага мувофиқ тасдиқлансин.
3. Ўзбекистон ёшлар иттифоқи Сирдарё вилояти Кенгаши, вилоят Халқ таълими бошқармаси, Сирдарё вилояти касбий таълимни ривожлантириш ва мувофиқлаштириш ҳудудий бошқармаси билан ҳамкорликда “Ёш қутқарувчи” кўнгиллилар клубларини ташкил этиш, уларнинг доимий фаолиятини таъминлаш ҳамда мазкур клублар ўртасида ҳар бир тизимда уч босқичли мусобақаларни ўтказиш бўйича масъул эканлиги кўрсатиб ўтилсин.
4. Соғлиқни сақлаш бошқармасига жойларда фаолият олиб бораётган клуб аъзолари иштирокида тиббий тайёргарлик бўйича назарий ва амалий машғулотлар ташкил этиш, мусобақанинг барча босқичларида малакали мутахассислар билан таъминлаш вазифалари юклатилсин.
5. Мусобақанинг якуний финал босқичида иштирок этадиган жамоа аъзоларининг йўл ва овқатланиш харажатлари ҳудудий ташкилий қўмита томонидан юборувчи ташкилот зиммасига юклатилсин.
6. Мусобақанинг умумтаълим мактаблари ҳамда ўрта махсус профессионал таълим муассасалари ўқувчилари ўртасидаги республика босқичларини ўтказиш учун молиявий харажатлар ҳиссадорлик асосида қоплансин.
7. “Ёш қутқарувчи” кўнгиллилар клубини тузиш, ҳар бир тизимда мазкур клублар ўртасида уч босқичли мусобақани ташкил этиш ва ўтказишга масъул ташкилотчиларнинг фаолияти Сирдарё вилояти Фавқулодда вазиятлар бошқармаси томонидан мувофиқлаштириб борилиши белгилансин.
8. Қарор ижросини назорат қилиш Сирдарё вилояти Фавқулодда вазиятлар
бошқармаси бошлиғининг биринчи ўринбосари Б.Режепов, Ўзбекистон ёшлар иттифоқи Сирдарё вилояти Кенгаши раиси Н.Холбоева, Сирдарё вилояти Жисмоний тарбия ва спорт бошқармаси бошлиғи ўринбосари Э.Шукуров, Сирдарё вилояти Халқ таълими бошқармаси бошлиғи О.Донабаев, Сирдарё вилояти касбий таълимни ривожлантириш ва мувофиқлаштириш ҳудудий бошқармаси бошлиғи А.Хажимуратов, Сирдарё вилояти Маданият бошқармаси бошлиғининг ўринбосари Ш.Мисралиев ҳамда Сирдарё вилояти Соғлиқни сақлаш бошқармаси бошлиғининг биринчи ўринбосари А.Мирзаханов зиммасига юклатилсин.
9. Мазкур қарор имзоланган кундан эътиборан кучга киради.