Yoshlarni ijtimoiy himoyalash masalalari Reja: Kirish. Asosiy qism

Yoshlarni ijtimoiy himoyalash masalalari

Reja:

Kirish.

Asosiy qism

1. 
   O’zbekistonda mustaqillik yillarida yoshlarni ijtimoiy himoyalash tizimi.
   
2. 
   O’zbekistonda aholini ijtimoiy himoyalash jarayonining xuquqiy asoslari.
   
3. 
   O’zbekistonda aholini ijtimoiy himoyalash jarayonining iqtisodiy asoslari
   

Xulosa.

Foydalanilgan adabiyotlar ro’yhati


Kirish.

Mamlakat va millatning rivojlanishi, uning kelajagi ko’p jihatdan aholininig ijtimoiy himoyalanganligiga ham bog’liq. Haqiqatdan ham, ijtimoiy himoya tizimisiz mamlakat taraqqiyotini tasavvur etish juda qiyin. Sovet davri sharoitida ijtimoiy himoya tizimi tashkil etilgan, aholini ijtimoiy himoya qilishda qator ishlar amalga oshirilgan bo’lsada, ammo ular asosan sobiq markazning manfaatlari uchun xizmat qilar va ularning ruxsati bilan amalga oshirilar edi.

Mustaqillikka erishgan dastlabki kunlardanoq O’zbekiston Respublikasida aholini ijtimoiy himoya qilish davlatimizning asosiy vazifalaridan biriga aylandi. Respublikamiz Birinchi Prezidenti I.A.Karimov Mustaqillikning dastlabki kunlarida O’zbekistondagi ahvol haqida shunday degan edi, “Mamlakat katta falokat yoqasiga kelib qolganini ko’rib turibmiz. Xalq ertangi kuniga ishonchini kundan- kunga yo’qotyapti. Odamlar o’zlarining oilasining, bola-chaqasining tinchligiga kafolat istaydi. To’kis, xotirjam hayot talab qilyapti. Bu istaklar, bu talablar safsatabozlik va va’dabozlik ostida ko’milib ketyapti. Bizning xalqimiz sabr-bardosh, yaxshilik, osoyishtalik, boshqa xalqlarga nisbatan xayrixohlik ruhida tarbiyalangan. Bu xalq bugun bizdan himoya talab qilyapti, tinch-totuv hayot, og’ir mehnatiga yarasha turmush sharoitlarini talab qilyapti. Bu- haqqoniy talabdir”¹ O’zbekiston tanlagan islohot yo’li ijtimoiy yo’naltirilgan bozor iqtisodiyotini shakllantirishga qaratilgan bo’lib, u bozor mexanizmining samarali ishlashini, aholi turmush farovonligini yuqori bo’lishini va aholi uchun kuchli ijtimoiy ximoya kafolatlarini nazarda tutadi. Ijtimoiy himoya insonning turmush darajasi bilan uzviy bog’liqdir.

O’zbekistonda 1989 yildan keyin, ya’ni I.Karimovning Respublikamiz rahbari bo’lib kelgan dastlabki kunlardan aholini ijtimoiy himoyalashga alohida e’tibor qaratilib, nihoyatda katta mablag’lar sarflandi, aholi turmush sharoitining yaxshilanishiga va aholini ijtimoiy himoyalash tizimini kuchaytirishga e’tibor berildi.

Respublikamizda ijtimoiy siyosatning muhim ahamiyatga ega ekanligi nafaqat iqtisodiy va siyosiy vaziyatlargagina bog’liq, balki xalqning ma’naviy qadriyatlariga asoslanib sog’lom avlodni tarbiyalash, ko’p bolali oilalarga madad berish, qariyalarga g’amxo’rlik qilishdan ham iboratdir.

Qolaversa, aholining kam ta’minlangan va kam himoyalangan qismi-bolalarga, ayollarga, qariyalarga, nogironlarga ijtimoiy yordam berish va ularning turmush sharoitini yaxshilash bir tuzumdan ikkinchi tuzumga o’tishda fuqarolarning davlatga, iqtisodiy va ijtimoiy islohotlarga bo’lgan ishonchini yanada kuchaytirishga yordam beradi.

Aholini ijtimoiy himoyalash va ijtimoiy ta’minot, aholining salomatligi hamda sog’liqni saqlash tizimi, kadrlar tayyorlash va ta’lim tizimi, madaniyat va sportni rivojlantirish borasida olib borilayotgan chora-tadbirlarni amalga oshirilishi mamlakatimizda aholini ijtimoiy himoyalash tizimining evolyutsiyasi uchun muhimdir.