Янги Ўзбекистон – мактаб остонасидан бошланади”

“Янги Ўзбекистон – мактаб остонасидан бошланади”

Бугун Олтинсой туманидаги 2-умумтаълим мактабида ҳам “Сўнгги қўнғироқ” байрам тадбирлари кўтаринки руҳда нишонланди. Байрамга битирувчи синф ўқувчиларининг ота-оналари, фахрий устозлар, маҳалла фуқаролар йиғини мутасаддилари, туман ташкилотларидан меҳмонлар таклиф этилди. Байрам тадбирлари ўтказиш жойи очиқ табиат қўйнида ташкиллаштирилди.
“Сўнгги қўнғироқ” байрами давлатимиз Мадҳияси садолари остида очилиб, даврага мактабнинг 37 нафар 11-синф битирувчилари таклиф этилди. Шундан сўнг мактаб директори У. Қобилов битирувчиларни табриклаб, президентимизнинг мактаб битирувчиларига аталган табригини ўқиб эшиттирди. Байрам шунинг билан куй-қўшиқларга уланиб кетди. Синфларининг қизиқарли чиқиши, рақс ва жонли ижролари мехмонларга хуш кайфият бағишлади. Туман халқ таълими бўлимидан вакил О. Элмуродовнинг байрам табриги ва мактаб кутубхонасига шахсий совғаси қатнашчиларнинг олқишига сазавор бўлди. Мактаб илмий бўлим мудири Т. Соқиев ўқув йили давомида юксак натижа кўрсатган устоз ва ўқувчиларни фахрий ёрлиқлар билан мукафотлади. Ота-оналарга сўз навбати берилиб, уларнинг фарзандларга самимий тилаклари тингланди. Туман маданият уйи қошидаги “Юлдузча” болалар рақс дастасининг чиқишлари байрам кўркига кўрк қўшди.
Байрамда 11-синф акалари жажжи 1-синф ўқувчиларимизни елкаларида кўтариб, 2020-2021-ўқув йилининг сўнгги қўнғироғини чалдилар. Эстафета байроғи ва “Билимлар калити” келгуси битирувчиларга тантанали тарзда топширилди.
Байрам тадбирлари ғоятда қизиқарли тарзда давом этиб, ва охирда “Хайр, мактабим!” қўшиғи садолари остида якунланди.