Soddalashtirilgan fizioterapiya muolajalarini o’tkazish Bemorga isitgich (grelka) qo‘yish

Soddalashtirilgan fizioterapiya muolajalarini o’tkazish
Bemorga isitgich (grelka) qo‘yish. Isitgichlar yallig‘lanish jarayonlarini so‘rish, tanani isitish va og‘riq qoldirish uchun qo‘llaniladi. Isitgich tayyorlashga monelik qiladigan hollar: qorin bo‘shlig‘idagi o‘tkir yallig‘lanish (appenditsit, xoletsistit, pankreatit), o‘smalar, qon oqishi, lat yeyish (dastlabki soatlarda) hisoblanadi. Tibbiyotda rezinali va elektr isitgichlar ishlatiladi. Rezinali isitgichning sig‘imi 1–1,5 litr, tiqini yaxshi burab berkitiladigan yoki to‘rtburchak shaklga ega bo‘lgan moslamadan iborat.
Isitgich qo‘yish algoritmi:
1. Isitgichning butunligi tekshiriladi.
2. Uning 3/4 qismi issiq suv bilan to‘ldiriladi.
3. Havo chiqarib yuboriladi.
4. Isitgich og‘zi tiqin bilan mahkamlanadi.
5. Isitgichning og‘zini pastga qaratib, qopqoqning zichligi tekshiriladi.
6. Isitgich sochiqqa o‘ralib, bemorning kerakli joyiga qo‘yiladi.
7. Isitgich 20 daqiqa davomida qo‘yiladi.
Og‘ir yotgan bemorlar issiqlik ta’sirini hamma vaqt ham sezavermasliklari sababli isitgichdan kuyib qolishlari mumkin. Terida qizarish (pigmentatsiya) hosil bo‘lmasligi uchun unga vazelin yoki yog‘ surtish lozim. Hushsiz holatdagi, teri sezuvchanligi yo‘qolgan bemorlar bilan ishlashda alohida ehtiyotkorlik lozim bo‘ladi. Suvli isitgichlar o‘rniga elektr isitgich qo‘llash mumkin. Uning issiqlik darajasi reostat bilan boshqariladi.
Bemorga muzli xaltacha qo‘yish.Quruq sovuqning teriga ta’siri natijasida qon tomirlari torayishi va chuqur joylashgan to‘qimalarda sezgining pasayishi kuzatiladi. Muzli xaltacha qon ketganda, qorin bo‘shlig‘ida o‘tkir yallig‘lanish holatlarida, lat yeganda, isitma ko‘tirilganda, operatsiyadan keyingi davrda qo‘llaniladi.
Suvli xaltachani muzlatgichning sovitish kamerasiga qo‘yib muzlatish mumkin emas, chunki suv muzlatgichda katta, yaxlit sath hosil qiladi, bu esa qo‘llash jarayonida ma’lum joyning yallig‘lanishiga olib keladi.