Сирли учбурчак

СИРЛИ УЧБУРЧАК


Бу ерда кўплаб кема ва самолётлар изсиз ғойиб бўлган, минглаб одамлар ҳалок бўлган. Бироқ қидирувларда бирорта жасад ёки кема-ю самолёт парчаси топилмаган!
Бермуд учбурчаги – бу Бермуд ороллари, Флоридадаги Майами ва Пуэрто-Рико оралиғидаги ҳудуд бўлиб, унинг майдони миллион квадрат километрдан зиёдроқ. Мазкур ҳудуд соҳилларининг рельефи яхши ўрганилган, улар нефть ва бошқа фойдали қазилмалар излаб бир неча бор қазилган. Йилнинг турли даврларида сув оқими, унинг тузлилик даражаси ва ҳарорати, океан устида ҳаво массаларининг ҳаракати – барча табиий маълумотлар ўрганилиб, махсус каталогларга киритилган. Бу ҳудуд шу каби бошқа географик жойлардан унчалик жиддий фарқ қилмайди.
Сирли оловлар ва Ғалати Ҳалокатлар

Денгизчилар Бермуд учбурчагини турлича аташади: "ажал учбурчаги", "фалокат келтирувчи денгиз", "Атлантика қабристони". Кўп асрлар давомида саёҳатчилар тасодифан бу жойда баъзан сирли сокинликка, баъзан эса даҳшатли бўронларга дуч келишган. Христофор Колумб ҳам, уммоннинг мана шу қисмига келганида, ўзининг кема журналига қизиқ далилни ёзиб қўйган: гуруҳ аъзолари сувда ўзига хос, нурланувчи доғлар сузиб юрганини кўришган. Бу сирли ёғдулар – кўпикка ўралган нурланувчи доғларни ҳозирги кунда ҳам кузатиш мумкин. Баъзан бу нурланиш шу даражада кучли бўладики, уни ҳатто космосдан кўриш мумкин. "Аполло-12" фазовий кемасида учган америкалик астронавтларнинг ҳисоботида кўрсатилишича, старт пайти улар Бермуд учбурчаги ҳудудида ғайриоддий липиллаган ёғдуни кўришган. Мазкур хавфли зонада бўлганлар ҳам ғалати сукунатлар, сув ўрамлари ва тасодифий довуллар ҳақида гапиришади. Бундан ташқари, барча асбоб-ускуналар бу ерда бузилиб қолади ёки тўғри ишламайди, компас миллари ғириллаб айланаверади; учувчилар об-ҳавонинг тўсатдан ёмонлашганини кўришган. Сирли ўзгаришлар бошланишидан бурун эса уфқни ғалати сариқ туман қоплаб оларкан.Бермуд учбурчаги баъзан денгиз ва ҳавода ҳақиқий хавф туғдиради. Бу жой Ер юзидаги компас тўғри ишламайдиган иккита ҳудуддан биридир. Бунинг натижасида эса кема ва самолётлар нотўғри йўналишда ҳаракатланиши, бу ҳақда команда аъзолари умуман билмаслиги мумкин. Балки айнан шунинг учундир, бу ерда ҳатто денгиз жониворлари ҳам ғалати: балиқчилар бир неча бор ғалати ҳодисага – тўнкарилган (қорни осмонга қараган) ҳолда сузаётган балиқларга дуч келишган.