Сирдарё вилояти халқ таълими бошқармасининг вилоятдаги барча ота-оналарига мурожаати муҳтарам ота-оналар!

Сирдарё вилояти халқ таълими бошқармасининг
вилоятдаги барча ота-оналарига
МУРОЖААТИ
Муҳтарам ота-оналар!
Биз устоз муаллимлар қалбимизда Муҳтарам юртбошимиз айтганларидай “Тараққиётнинг тамал тоши ҳам, мамлакатни қудратли, миллатни буюк қиладиган куч ҳам бу -илм-фан, таълим ва тарбиядир” деган ғояларини ёшлар онгига сингдириб боришга масъулмиз.
Сизнинг оила бўстонингизда дилбанд фарзандингиз вояга етмоқда. Кўзингиз нури, белингиз қуввати бўлган фарзандингиз илк маротаба илм даргоҳига қадам қўйганда, қалбингиз ажиб бир хис-туйғуга берилиб, унинг билимли, одобли бўлишини орзу қилгансиз.
Ҳар бир ота-она орзу умидлари, ҳавасларини ўз фарзанди қиёфасида кўришни ният қилади.
Минг афсуски, айрим ота-оналар фарзанд тарбиясига фақат ўқитувчи масъул деган фикрда юришмоқда. Фарзандининг таълим-тарбиясига вақт ажратиш учун вақтларини қизғанмоқдалар.
Эслай оласизми охирги маротаба қачон ўғлингиз ёки қизингизни ёнингизга чорлаб бугунги тарбияси, орзулари, мақсадлари, билими ва ахлоқи билан қизиқдингиз, дарс тайёрлашишига кўмаклашдингиз, қайси касб эгаси бўлмоқчи эканлиги билан ўртоқлашдингиз. Унинг билим олиши, ўзи қизиққан тўгаракларга бориши учун қандай шарт-шароитлар яратиб бердингиз? Фарзандингизга китоб совға қилдингизми? Унинг дўсти кимлигини суриштирдингизми? мобил телефонини текширдингизми?, дарс жараёнида ота-оналар столида ўтириб, фарзандингизнинг хатти-харакатлари, дарсга тайёргарлигини кузатдингизми? Ўзимизга берадиган саволлар бисёр...
Фарзанд тарбиясига беэътибор бўлманг. Вақти келиб, сизга бола тарбиясида арзимас туюлган оддий воқеалар, эртанги кунда катта-катта йўқотишлар, ховотирли куни-тунларни олиб келиши мумкин.
Фарзанд тақдирига барчамиз масъул эканлигимизни асло унутмайлик.
Сизга кексайган вақтингизда фарзандлар ардоғида, роҳат-фароғатда яшаш насиб этсин!