O‘zbekiston yoshlari buzg‘inchi g‘oyalarga qarshi

O‘zbekiston yoshlari buzg‘inchi g‘oyalarga qarshi.

Bugungi kunda biz yoshlarga berilayotgan imkoniyat va shart-sharoitlarning chek-cheki yo‘q. Biz o‘zimiz qiziqtirgan sohamizda o‘qish va izlanishlar olib bormoqdamiz. Hozirgi zamonaviy axborot texnologiyalari asrida har bir kunimizni kompyuter va telefonlarsiz tasavvur qilish qiyin. Ammo internetdan foydalanish madaniyati, jahon axborot tarmog‘idan ongli foydalanishni yoshlar unutib qo‘ymoqdalar degan fikrlarni ko‘p bora eshitamiz. Internetdan foydalanish madaniyati deganda, albatta, internet tarmoqlariga to‘g‘ri yondashib, to‘g‘ri ma‘lumotlar olish nazarda tutiladi. Hozirgi kunda internet tarmoqlariga kirib o‘zimiz uchun kerakli ma‘lumotlarni qidirganimizda, mintalitetimizga xos bo‘lmagan turli behayo rasmlarni, reklamalarni ko‘rishimiz mumkin. Endi tasavvur qilib ko‘ring, internetdan foydalanish madaniyatini bilgan kishi u yerdagi madaniyatsiz narsalarni ko‘rib, qanday madaniyat bilan foydalana oladi? Nega hozirgi kunda ma‘lumotlar bilan birga kelayotgan, kishining ongini zaharlayotgan bu narsalarni cheklab bo‘lmayapti?-, degan savol biz yoshlarni juda o‘ylantirib qo‘ymoqda. Yana bir hayotiy misolga qaraydigan bo‘lsak, yoshlar aynan shu rasmlarni ko‘rib, chet el kiyinish madaniyatiga taqlid qilmoqda. Bularning oldini olish uchun avvalo, internet tarmoqlaridagi keraksiz ma‘lumotlarni cheklash va har bir soha yoshlariga ma‘naviy- ma‘rifiy ta‘lim-tarbiyani kuchaytirish lozim.

Islom Karimov o‘zining " Yuksak ma‘naviyat-yengilmas kuch" asarida " Bu dunyoda tabiatda ham, jamiyatda ham bo‘shliq bo‘lmaydi, qayerdadir bo‘shliq paydo bo‘ldimi hech shubhasiz, uni kimdir to‘ldirishga harakat qiladi "-, deganlarida mutlaqo haq edilar. Yoshlarning ijtimoiy tarmoqlar orqali diniy ekstrimizm va boshqa yot g‘oyalar ta‘siriga tushib qolishida, ularning ongida bo‘shliqning borligi sababdir. Din mavzusiga e‘tibor bersak, u har qanday insonni o‘ziga jalb qila oladi. Chunki hammamizni ham bu dunyo va u dunyo haqidagi tasavvurlar qiziqtirmay qolmaydi. Dunyoviy bilimlar bilan bir qatorda diniy bilimlarning ham o‘z vaqtida egallab borilishi, insonning tafakkurini mustahkamlash bilan birga turli ta‘sirlardan ham asraydi. Bu bilimlarni egallashda, avvalo, ijtimoiy muhit, ayniqsa, oiladagi muhitning ahamiyati katta. Har bir inson ijtimoiy muhitda o‘zaro munosabatga kirishadi. Bunda kimning qanday bilimga ega ekanligi ko‘zga yaqqol tashlanar ekan, ko‘p yoshlarning diniy bilimlarining juda pastligini ko‘rishimiz mumkin. Payg‘ambarimiz ( s.a.v ) har doim bajarilishi kerak bo‘lgan sunnatlarini bilmagan kishi diniy guruhlarning turli g‘oyalariga qo‘shilib ketishi hech gap emas. Jamiyaga e‘tibor bersak, o‘ziga to‘q oilaning farzandi hech qanday kamchilik va qiyinchiliksiz o‘sadi. Bu o‘z navbatida irodaning bo‘shligi, sabrsizlik kabi hislatlarning paydo bo‘lishiga sabab bo‘ladi. Bugunda shunday yoshlarni turli yot g‘oyalarga qo‘shilib ketishining guvohi bo‘lyapmiz.

Insonga kundalik turmushdagi har qanday voqea- hodisa bevosita ijobiy yoki salbiy ta‘sir ko‘rsatishi bilan birga uning hayotini han o‘zgartirishi mumkin. Biz bunday masalalarga ongli ravishda yondashib, o‘zimizga to‘g‘ri xulosalar chiqarishimiz kerak. So‘z mulkining sultoni, Alisher Navoiy bobomiz aytganlaridek, inson o‘z ongi bilan boshqa mavjudotlardan ajralib turadi. Yaqinda unversitetimizda bo‘lib o‘tgan " Naqishbandiya- barcha zamonlar uchun zarur ta‘lim" mavzusidagi konferensiyada Naqishbandiyshunos olima va olimlarimiz bu ta‘limotning tub mohiyatini ochib berdilarki, unda inson o‘zligini anglashiga yordam beradigan g‘oyalar mujassamlashgan. Bundan ko‘p yoshlar o‘ziga yarasha xulosalar chiqarishdi. Bizning yurtimizda bunday avliyolar, mutafakkirlar juda ko‘p. Ularning har birining ta‘limotlarini o‘rganish bizning burchimiz. Kitob mutolasi, ko‘p kitob o‘qish insonning tafakkurini o‘stiradi. Uni turli yot g‘oyalardan, bo‘shliqlardan halos qiladigan ham kitobdir. Shunday ekan, har doim kitob bilan do‘st tutunaylik. Shunda har qanday ta‘sirlarga qarshi o‘zimizda immunitet hosil qila olamiz va buzg‘unchi g‘oyalarni yenga olamiz.