Eh mening telba yuragim Nega uni o‘ylaysan hamon

Eh mening telba yuragim

Nega uni o‘ylaysan hamon

Bormi endi unga keragim

Yo yor vasli bo‘larmi armon

Orzularim limmo-lim dilda

Har nafasda u deb yashayman

Unutdim deb aytsam ham tilda

Yuragimni unga tutgayman

U befarvo yoki u beishq

Halovatim oldiyu ketdi

Balki bo‘lgan yolg‘ondan oshiq

Bizning kema manzilga yetdi

Bas bu holga berolmam bardosh

Ko‘zyoshlarim yuvar yuzimni

Nahot ekan shuncha bag‘ritosh

Ko‘r qildimi sevgi ko‘zimni

To‘g‘ri o‘tdi mendan ham xato

Ozor berdim ko‘ngliga bisyor

Yoshlikdanmi yoki beboshlik

Tushunganda kech bo‘ldi ammo

Ko‘p so‘zladim xo‘p og‘ir so‘zlab

Yor dilini qildimku pora

Peshonada bor ekan yo Rab

Chidaymanda endi na chora

Umid so‘nmas qalbimda hamon

Baxt bog‘iga juda oz qoldi

Bizning sevgi bo‘lmas hech armon

Olloh shuni ko‘nglimga soldi

Demak hali oldinda hayot

Baxtli kunlar kutar bizlarni

Sabr qalbga eng yaxshi najot

Rahmat senga ey aziz hayot.

Manzilimga eltar yo'l olis bo'lsa netayin?

Yurak deydi:"Izn ber, men bosh olib ketayin.

Kul qildiku batamom ishqdan qolgan harorat,

Na kechani bilaman, na kunduzda halovat."

Ne deyishim bilmayman, qaytaray qanday javob,

"Baxt deb yo'lin kutganim" nahot barchasi sarob.

Umid bo'lib porlagan, bo'lsa u so'ngan yulduz,

Orzularim misoli, porlagan oydek kunduz.

Onam sochlariga oralagan oq

Darchadan qo‘l qoqib qolgan yoshligim

Otam qo‘llarini mehnatda qadoq

Aylagan o‘zimku sho‘x beboshligim

To‘g‘ri sochlarimni silamadingiz

Sochpopuklar yasab majnuntollardan

Baxtimdan o‘zgasin tilamadingiz

Yaratgan egamdan tangri taolodan

Bahor shukuhi

Eng buyuk musavvir chizdi bir surat

Mo‘jiza ko‘rasatdi yana u takror

Yashil to‘nin kiydi ona tabiat

Mehmonsan o‘lkamga yana sen bahor

Subhidam shabboda ko‘k uzra yelar

Yam-yashil maysalar yer yuzin bezar

Kurtaklar gul ochib bir-birdan o‘zar

O‘lkamda bahorning shukuhi kezar

"Men keldim " degandek butun olamga

Sep yoyding, men bir dam tashlagandim ko‘z

Oshno qilding meni qog‘oz qalamga

Qani tilga kelsa bittagina so‘z

Har kunni sarhisob etganmisiz hech

Qachon erta bo'lar qachon kirar kech

"Bu kun ham o'tadi o'tmagan kun yo'q"

Shunday yashlikki ko'ngil bo'lsin to'q

Halovat topaylik uzun kechalar

Bizni qarshilasin

huzurbaxsh tonglar

Uyg'otasin barchani erta saharda

Bomdod namoziga chalingan bonglar

Har bir kun tangridan ehson aslida

Yashaylik biz faqat jannat vaslida

Bir kuni yetadi umr so'ngiga

Shukrona qilaylik o'tgan har kunga

Bu yilcha shunaqa diydorlashaylik

Bir muddat azizlar shunday yashaylik

Hammamiz bir safda turib yonma-yon

Yovga qarshi ildam qadam tashlaylik

Oshiqmang vaqt ortsa ko‘cha sayliga

Erk bermang shu safar ko‘ngil mayliga

Kitobni qadrdon aylab o‘z uchun

Ko‘z tashlang bir marta "Majnun Layli"ga

Balki sizda bordir boshqa bir tadbir

Ishdan ortib vaqt bo‘lmagandir bir

Rasmlar solarsiz balki jilokor

Bu ishda sizdirsiz eng zo‘r mirishkor

Hali olam bizga chiqadi peshvoz

Shunda samo uzra qilamiz parvoz

Bir kuni yangraydi biz kutgan ovoz

Lek hozir biz uyda qolmog‘imiz soz

Ertangi kun uchun tashlaymiz qadam

Bugun kelajakka bizda ishon bor

Olg‘a bormoqdamiz odimlab ildam

Hammasi qo‘ldadir imkonlar bisyor

Tinch yurtim osuda otmoqda tonglar

Samolar bag‘rida hurriyat porlar

Vatanim baxtimga axir o‘zing bor

Nomingni dilimga yozayin takror

Matematik shoiradan