Dirijyor va kompozitor shermat yormatovning hayoti va ijodi

DIRIJYOR VA KOMPOZITOR SHERMAT YORMATOVNING HAYOTI VA IJODI


KIRISH SO’ZI
Bu kitobni ko‘pchilikka tanish, ko‘plab murg‘ak qalblarning ustozi, O‘zbekiston xor san’atining “bolalar xori” yo‘nalishida katta ijodiy burilishlar yaratgan, yangiliklar kiritgan, qolaversa boshqa davlatlar bolalar xoridan farqli o‘laroq milliylikka bilan yo‘g‘rilgan, noan’anaviy uslublarni dadil qo‘llagan holda xor san’ati rivojiga o‘z hissasini qo‘shib kelayotgan dirijyor, kompozitor, O‘zbekiston Yoshlar mukofoti sovrindori, “Sog‘lom avlod uchun” ordeni sovrindori, O‘zbekiston xalq artisti, “Fidokorona mehnatlari uchun” ordeni sohibi Shermat Yormatovning bosib o‘tgan hayot yo‘li haqida hikoya qilmoqchimiz. U inson ko‘plab ustozlar qo‘lida sidqi dildan ta’lim olib, ularni o‘z ota-onasiday qadrlab, mukammal shogird darajasiga yetishga intilgan va o‘z shogirdlariga ham shunday otalik qilib, ularga mehr berib, erkalab, kezi kelganda koyib hayotda o‘z yo‘lini topishiga bor bilimini, hattoki jonini ham berishga tayyor sevimli ustoz, ota, buva bo‘la olgan mehribon, mehnatsevar, ayniqsa, bilimga talabchan inson - Shermat Yormatovga bag‘ishladik.
O‘zining shirin so‘zligi bilan yoshlar qalbidan chuqur o‘rin egallab, ularga o‘z bilimini berishga butun umrini sarf qilib, hozirgi kunda ham o‘z ish faoliyatini jo‘shqin davom ettirayotgan inson hayoti bilan tanishtirishni o‘zimiz uchun burch deb bildik.
Deyarli yarim asr bo‘libdiki, Sh.Yormatov “Bulbulcha” bolalar ashula va raqs ansamblida badiiy rahbar lavozimida ishlab, ko‘plab avlod bolalariga musiqaning sehrli ohanglarini o‘rgatib, kuylash va dirijyorlik kasbining o‘ziga xos jihatlarini va mashaqqatlarini o‘rgatib, yurtimiz musiqa san’ati va madaniyatiga yetuk farzandlarni tarbiyalab, ularga vatanparvarlik ruhidagi kuylarni o‘rgatgan holda o‘z yurtiga, shahriga, qishlog‘iga, mahallasiga va oilasiga mehr-oqibat, muhabbat uyg‘otib, voyaga yetayotgan o‘smirlarga to‘g’ri yo‘l ko‘rsatib, hayotda o‘z o‘rniga, kasbiga, oilasiga ega bo‘lishni ham o‘rgatayotgan ustoz haqida qancha so‘zlasak ham kam deb o‘ylaymiz!
Shermat Yormatov biz uchun avvalo ota, buva, keyin ustoz, talabchan xor dirijyori sifatida hayotimizda yuksak cho‘qqilarga erishishib, o‘z yo‘limizni topishimizda doimo yonimizda turuvchi, ko‘makdosh insondir.
Kitobning birinchi qismi Shermat Yormatovning yoshlik davri, o‘qish jarayoni va ilk ish faoliyati haqida ma’lumotlar keltiramiz. Ikkinchi qismida esa ijodi va ishlash jarayonida qo‘llagan uslublari va uning o‘z “yo‘li” haqida o‘qishingiz mumkin. Qolaversa, ustozimizning shogirdlari bo‘lmish - mashxur san’atkorlarning va hamkasblarining fikrlari va hayotiy hikoyalari kiritilgan. Uchinchi qismi nota yozuvlaridan iborat bo‘lib, Shemat Yormatov qalamiga mansub kichkintoylar, o‘rta va o‘smir yoshdagi bolalar uchun yozilgan asarlari ketma-ketlikda berilgan.
Ulardan o‘rganganlarimizni sizlar bilan baham ko‘rishni o‘z shogirdlik, farzandlik va nabiralik burchimiz deb bildik…